Ministru Edukasaun Juventude no Desportu, Armindo Maia, hateten prossesu rekrutamentu ba profesór 975, agora halo ona verifikasaun dadus, nune’e iha fulan Novembru bele prosesa.

“Agora dadaun ita nia ekipa halo ona verifikasaun, iha fulan Novembru ita verifika hodi bele hanorin estudante sira ne’ebé mak agora daudaun eskola sira pressiza,” Armindo Maia hateten iha Palásiu Governu, Kuarta (13/10).

MEJD sei tau prioridade liu ba profesór sira  ne’ebé iha seriedade hodi  hanorin, hanesan profesor ne’ebé dedika an hodi hanorin kleur ona, desde uluk mai to’o agora, ho ida ne’e sira iha ona planu atu rekruta tan profesor 975 atu bele prienxe númeru profesór ne’ebé hahú menus.

Ho planu ne’ebé MEJD iha atu rekruta profesór 975 ne’e, sei aprezenta ba Konsellu Ministru nune’e bele hetan deliberasaun,  tanba profesor barak mak tama ona vida reforma, mate, no balun rezigna-an.

Tuir loloos prosesu preparasaun rekezitu rekrutamentu ba profesor 975 ne’e remata ona, tanba de'it pandemia Covid-19 ne’e mak impede.

Dadus professor sira iha territoriu Timor laran, ne’ebe MEJD atualiza to’o ohin loron iha na'in-16.618, kompostu hosi profesor kontratadu hamutuk 5.000 no voluntáriu 1.000.

Antes ne’e Koordenador EBF Kuluhun, Domingos Magno, hateten MEJD tenke rekruta professor balun ba sira, tanba desde iha tinan 2015 professor permanente na’in lima reforma ona ho idade ne’ebé mak avansadu, ho Ida ne’e iha eskola refere professor la sufisiente hodi hanorin estudante sira.