Primeiru Ministru, Kay Rala Xanana Gusmão, ne’ebé akompaña direta ekipa negosiasaun Timor-Leste nian, hatete katak diskusaun iha Singapura la’o ho atmosfera pozitivu, ho parte rua loke-an no rona malu hodi buka solusaun tuir Lei Direitu Internasionál Tasi nian.
“Diskusaun loron tolu iha Singapura susesu tebtebes. Parte rua hatudu open mind no konsege iha entendimentu ida hodi avansa ba rezultadu di’ak,” dehan PM liu husi komunikadu imprensa ne’ebé Jornal INDEPENDENTE ases.
Negosiasaun ne’e hanesan kontinuasaun husi ronda dahuluk iha Dili iha Agostu 2025 no ronda daruak iha Jogjakarta iha Dezembru 2025. Iha ronda datoluk ne’e, ekipa rua hatudu kompromisu forte atu kontinua prosesu negosiasaun ne’ebé kompleks.
PM Xanana mós agradese ba xefe delegasaun Indonézia nian, Laurentius Amrih Jinangkung, ne’ebé konsideradu iha abordajen open mind no konstrutivu durante negosiasaun.
Nia dehan atitude hanesan ne’e ajuda tebes hodi kria ambiente favorável ba progresu.
“Negosiasaun hanesan ne’e la fasil. Ida-idak defende nia direitu tuir lei internasional, maibé ho vontade di’ak no diálogu, ita bele hetan pontu komún,” akresenta PM.
Husi rezultadu ronda datoluk ne’e, parte rua konkorda atu avansa ba ronda dahaat iha fulan Agostu 2026 iha Bali, Indonézia.
Iha etapa tuir mai ne’e, diskusaun sei foka liu ba asuntu pendente sira, inklui fronteira marítima no mos fronteira terrestre iha área Naktuka, Oecusse.
PM Xanana esplika katak Timor-Leste kontinua defende posisaun bazeia ba lei internasional no akordu istóriku, inklui akordu entre Portugál ho Olanda iha tinan 1904 kona-ba fronteira terrestre.
Iha sorin seluk, xefe delegasaun Indonézia, Laurentius Amrih Jinangkung, espresa apresiasaun ba lideransa PM Xanana ne’ebé akompaña direta prosesu negosiasaun.
Nia konsidera prezensa PM hanesan fonte motivasaun ba ekipa rua atu kontinua ho diálogu konstrutivu.
Delegasaun Timor-Leste nian lidera hosi Diretora Ezekutiva Gabinete Fronteira Terrestre no Marítima, Elizabeth Exposto, akompaña hosi Embaixadór Timor-Leste ba Indonézia, Roberto Soares.
Parte rua agora iha esperansa katak negosiasaun ne’e sei kontinua avansa ho di’ak, hodi alkansa solusaun justu no sustentável ba fronteira marítima, nune’e nasaun rua bele goza sira nia direitu ho klaru no kontribui ba estabilidade no kooperasaun rejional iha futuru.