Tuir sientista husi Organizasaun Mundial Saúde (OMS), Soumya Swaminathan, variante Delta ne’ebé identifika iha India hahú sai variante ne’ebé globalmente dominante.

“Variante Delta iha hela viajen hodi sai variante globalmente dominante tanba ninia transmisilidade ne’ebé sa’e,” dehan Swaminathan ne’ebé públika iha www.detik.com iha 19 Juñu 2021, no jornal INDEPENDENTE sita iha Kinta (24/06).

Iha posibilidade mós atu Timor-Leste hetan variante foun Covid-19, tan ne’e Ho ameasa variante foun ne’e tanba nasaun barak iha mundu mós hetan ona.

Diretora Jeral Prestasaun Saúde ne’ebé mós nu’udar Vise Kordenadora Sentru Integradu Jestaun Krize (SIJK), Odete da Silva Viegas husu atu hametin seguransa iha fronteira hodi evita variante foun ne’e tama.

Aleinde taka fronteira, nia hatutan, dalan seluk hodi evita variante foun ne’e mak liu husi vasinasaun.

“Ita espera katak ita-nia komunidade sira hotu hakarak ho laran rasik atu simu vasina hodi nune’e ita mós bele proteze ita-nia aan bainhira variante ne’e tama iha ita-nia rai,” dehan nia iha Klinika Fatumeta, Kinta (24/06).

Molok ne’e, bainhira koalia kona-ba vasina AstraZeneca, Ministra Saúde Odete Maria Freitas fó garantia katak vasina iha efetividade hasoru variante Delta.

“Dadus husi Reuni Unidu efetividade AstraZeneca hanesan ho Pfizer hasoru variedade foun Delta husi India,” dehan Ministra ne’e.