Ministru Obras Publika, Samuel Marcal hatete, governu iha ona planu atu hahú alargamentu ba estrada iha tinan ida ne’e, liu-liu husi rotunda Bidau tuun loos ba MOP nia oin to’o iha Katedral.

"Governu iha ona planu atu loke tan estrada to'o Katedral nian, Estrada urbana iha Dili laran sei loke halo luan, entaun pasensia uitoan, ita sei hadia,"dehan Ministru Samuel iha Palasiu Governu, Kuarta (07/01).

Hadia estrada de’it seidauk sufisiente se problema estasionamentu karreta no motor seidauk rezolve. Tan ne’e, governu sei hadia mós estasionamentu.

Tuir nia, problema iha Dili ne’e laos tanba estrada kloot, maibé tanba viatura sira seidauk para ho disiplina.

“Imi haree BJ Habibie nian, ita kria ona fatin para, maibé balu bapara arbiru de'it, ne'ebé presiza Polísia Tránzitu mak haree lorloron, eduka ita-nia komunidade sira para tuir fatin ne'ebé ita prepra ona,” dehan nia.

Tuir Ministru ne’e, Governu bele loke estrada luan to'o ne'ebé de'it maibé sei la rezolve problema se komunidade sira seidauk iha disiplina.

"Fatin ema la'o nian ne'e la'o duni, fatin para nian ne'e para duni. Ita dala-ruma ba para iha ema la'o nian,” dehan nia.

Ministru ne’e apresia ba komunidade sira, liu-liu sira ne’ebé nia uma iha estrada ninin, ne’ebé fó apoiu ba planu governu nian atu hadia infra-estrutura.

“Ha'u apresia tebes komunidade sira iha dalan ninin ne'e, sira kolabora no koopera di'ak tebes, tanbá laiha ema ida la hadomi no la hakarak rai ne'e atu bá oin.Ha'u fiar hotu-hotu hakarak haree ita-nia rai ne'e bá oin, liu-liu Dili hanesan kapitál presiza hotu-hotu nia kolaborasaun di'ak, kria sidade ne'e di'ak, foti ita hotu nia oin," Ministru ne’e dehan.

Relasiona ho preokupasaun balun kona-ba rotunda Bidau, Ministru ne’e hatete, rotunda ne'e laos problema prinsipal ba engarrafamentu tráfiku .

"Buat ne'e halo ema enjiñeru matenek boot sira tuur hamutuk hatama iha sistema, haree hotu ona mak hodi halo, dala-ruma ha'u mós ba haree, tuur iha ne'ebá oras rua ka tolu akompaña,laos rotunda oan ne'e mak halo engarrafamentu tráfiku, lae, maibé tanba kareta mikrolete sira liu mai par hotu iha Hali-hun ne'e hodi afeita bá engarrafamentu,” dehan nia.

Hakarak lee notisia kompletu no notisia sira seluk tan, asesu link e-paper INDEPENDENTE:https://digital.independente.tl. edisaun sexta (09/01)