Ministru Juventude Desportu, Arte no Kultura, Nelyo Isaac Sarmento hatete, fasilidade deposrtu liu-liu futebol la’o hela, identifika hela fatin balun oinsá mak atu ajuda dezenvolve futeból.
“Kona-ba fasilidade deposrtu liu-liu futebol ita la’o hela, identifika hela fatin balu oinsá mak atu ajuda dezenvolve fasilidade sira nee, neste momentu ita entrega ona estádiu Munisipal Dili ba Federasaun, tanba sira dehan katak sira iha osan naton atu hadi’a ka rehabilita,” Dehan Ministru Nelyo ba jornalista sira, hafoin Audiénsia ho Komisaun G, iha Parlamentu Nasionál, Kinta (05/03).
Nia haktuir, Estádiu Munisípal Dili agora dadaun FFTL atu halo ona reabilitasaun.
Kona-ba estadiu atu harii iha Tasi tolu, nia informa, sei iha diferensa hanoin balun entre grupu sosiedade sivil no mós parte Igreja ni’an.
“Agora estádiu foun iha Tasi-Tolu ita sei iha diferensa hanoin balun entre Grupu sosiedade sivil no mós parte Igreja nian. Maibé governu la’ós para, maibé Governu buka nafatin meius husi rai balun ne’ebé sei livre, atu kontinua deit konstrui estádiu futeból, Rai barak loos, ami identifika, maibé haree loos ida ne’ebé mak diak, atu labele gangu ema seluk no mós gangu orden públiku hanesan engrafamentu,” Tenik nia.
Molok ne’e, Prezidente Federasaun Futeból Timor-Leste (FFTL), Nilton Telmo Gusmão hatete, prosesu konstrusaun estádiu foun ne'ebe tuir planu sei harii iha Tasi-tolu.
“Ita hatene katak rai ne'ebe antes ne'e liu governu liu husi Konsellu Ministériu deside ona, maibe durante ne'e ita iha diskusaun balun ho parte igreja, nune'e ita konsidera opiniaun igreja nian,” Afirma Prezidente FFTL, Nilton Gusmão, ba jornalista sira iha Otél Timor, Domingu (30/11).
Nia hatete, maske iha diskusaun barak, maibe prosesu la’o hela, tanba Federasaun Futeból Timor-Leste la’o hamutuk ho Governu.
“Prosesu konstrusaun estádiu internasionál foun iha Tasi-tolu lao hela, tanba ita lao hamutuk ho governu, tanba ne'e governu deside ona atu re-aloka fila-fali ba fatin seluk, iha mos area Tasi tolu, maibe la’os iha fatin ne'ebe planu inisial ita aprezenta ba Konsellu Ministru,” Nia informa.
Tanba, tuir planu prosesu konstrusaun estadiu Tasi tolu, sei hahu konstrui iha iha fulan fevereiru tinan-2026
"Tanba ne'e tuir planu ita sei harii iha tinan-2026, tanba tinan ne'e ita tama ona fulan dezembru, entaun ita labele halo buat barak, maibe ha'u fiar tinan-2026 iha fulan-fevereiru ou marsu ita bele iha ona prosesu ruma ba konstrusaun estádiu foun ne'e,” Nia afirma.
Tuir nia, iha futeból infraestrutura importante tebes, tanba bainhira la iha infraestrutura futeból labele la’o ba oin.
“Ha'u hanoin infraestrutura importante tebes, tanba se la iha infraestrutura ita labele ko'alia barak kona-ba futeból, se ita hakarak asiste futeból iha ita nia rain rasik, ita tenke iha infraestrutura ida adekuadu, tuir estandar internasionál,” Nia fundamenta.