“Ha’u hanoin laiha buat ida mak sei falta, maibé hein koordenasaun ida husi parte FFTL ho Ministeriu Desportu, husi parte Ministeriu prontu atu kolobora hodi atribui rai ba harii estádiu ne’e”, Informa Ministru Justisa, Sérgio Hornai ba Jornalista sira, iha Palásiu Governu, Segunda (08/09).

Ministru ne’e dehan, nia parte ko’alia ona ho Ministru Joventude kona-ba prosesu sira oinsa mak bele atribui rai ba konstrusaun ba estadiu foun ne’e rasik.

“Ami ko’alia hela hodi hare oinsa mak haree rai nee, atu bele halo atribuisaun, maibe depois atribui atu halo ka la halo nee kompetensia Ministeriu Joventude mak hatene, kolabora ho Federasaun Futebol Timor-Leste,” Governante ne’e esplika.

Purtantu, liu-husi konferénsia imprensa iha loron 12 agostu tinan ne’e, Prezidente FFTL, Nilton Telmo Gusmão dos Santos hatete, sentimentu triste no nakonu ho duvida  kona-bá esforsu sira FFTL nian atu dezenvolve infraestrutura futeból iha Timor-Leste, mas kuaze la hetan apoiu husi Governu liu husi MJDAK.

Nilton Gusmão dos Santos, fó lembra katak Konsellu Ministru aprova tiha ona proposta FFTL nian atu halo reabilitasaun ba Estádiu Munisipál Dili dezde loron 04 fulan-Juñu 2025, maibé too agora MJDAK nunka sumu audiénsia ho FFTL atu halo diskusaun klean ba implementasaun prosesu reabilitasaun nee hodi estimula iha akordu konsesaun entre FFTL ho MJDAK. 

Enkuantu, Governu Konstitusionál dasia liuhusi reuniaun Konsellu Ministru, iha kuarta  04 fulan-Juñu 2025, iha Palásiu Governu, aprova  proposta husi Federasaun Futeból Timor-Leste (FFTL) neebé atu halo reabilitasaun ba Estádiu Munisipál Díli no halo tán konstrusaun foun ba Estádiu ho kampu futsal indoor tuir padraun internasionál iha Tasi-tolu.

“Sé MJDAK la fó  autorizasaun estádiu Dili bá FFTL, ami informa bá FIFA katak  ita nia Governu  la presiza apoiu ruma, ita informa bá ida-nee ba FIFA hodi fundu $3,000,000.00 nee haruka fali ba nasaun  seluk neebé maka presiza liu, tanba ita la presiza,”  Nilton  hateten.

Nilton deskobre sai katak FFTL laiha hanoin ruma atu  hadau podér ema ruma nia ka atu   ultrapasa   póder ema seluk nian, maibé FFTL  hanoin  atu halo kolaborasaun sirúrjiku diak bá  desportu  espesiál futeból bá  kamada juventude nia futuru  tanba estádiu harii  ohin, jerasaun futuru sira  sei uza bá atividade futeból Timor-Leste.

“Dala ida-tan, se MJDAK laiha duni  interese atu simu reabilitasaun Estádiu Munisipál Dili,  klaru ami FFTL mós sei  la halo buat ida, tanba apoiu fundu nee ita tenke halo buat ruma iha rai, ami la bele halo iha anin,” Nilton hatete.

FFTL kontinua hakarak hakbesik ba  Governu atu transforma mehi futeból nuudár orgullu nasionál  sai realidade no aproveita fundu FIFA ho AFC nian atu bele kria kondisaun infraestrura, maibé la hetan resposta pozitivu husi MJDAK.

“Desizaun Governu nian  aas liu maka Konsellu Ministru, Governu aprova hakarak   hakuak projetu neebé maka  ami aprezenta, ami husi FFTL agradese tebes bá desizaun Governu ho konfiansa tomak neebé maka fó ona liu-husi Konsellu Ministru atu lori projetu nee bá oin, maibé infelizmente projetu nee hasoru beibeik dezafiu tanba la iha kolaborasaun diak husi MJDAK,” Nilton tenik.

Nia konta tan katak, mensajen klaru  neebé  neebé nia   hetan husi  Prezidente FIFA, AFC no mós AFF  husu FFTL  halo esforsu hotu atu nunee lori futeból fila hikas mai Timor, maibé futeból labele fila sé  Timor  rasik laiha infrastrutura ruma.

FFTL nia  pozisaun klaru,  hakarak servisu hamutuk ho Governu atu bele lori dezenvolvimentu iha área desportu espesialmente futeból iha Timor-Leste, tanba entidade hatene se Timor-Leste  adere bá ASEAN, Timor sei iha atividade ASEAN lubuk ida, loron ruma, sedu ka tarde, Timor-Leste sei sai uma-nain bá atividade  futeból ASEAN nian. Tanba ne’e, Nilton dos Santos afirma, presiza infrastrutura sira ne’e.