Print this page

Ministériu Hotu Presiza halo Sosializasaun ba Diresaun Sira Kona ba PAN-EhD

By Saturnina da Costa Outubru 13, 2021 355
Diretór Ezekutivu ADTL, Cesario da Silva. Foto: Saturnina/INDEPENDENTE. Diretór Ezekutivu ADTL, Cesario da Silva. Foto: Saturnina/INDEPENDENTE.

DILI: Asosiasaun Defisiensia iha Timor-Leste (ADTL) husu ba Governu liu husi Ministeriu relevante sira atu halo sosializasaun ba nia diresaun hotu, kona ba Planu Asaun Nasional Ema ho Defisiensia.

Enkuantu, Planu Asaun Nasional ba Ema ho Defisiensia ne’e aprova ona iha Konsellu Ministru (KM), iha loron 6 fulan-Outubru tinan 2021, ne’ebé aprezenta husi Ministra Solidariedade Sosial no Inkluzaun, Armanda Berta dos Santos.

Ho objetivu, atu garante promosaun direitu ema ho defisiensia nian.

Nune’e, planu ne’e sei implementa hahú iha tinan 2021 to’o 2030, tuir orientasaun sira ne’ebé define ona husi politika nasional ba inkluzaun no promosaun direitu ema ho defisiensia, ne’ebé aprova liu husi Rezulusaun Governu nú.14/2012, loron 9 fulan-Maiu, liu husi asaun lubun ida atu dezenvolve ho forma artikulada husi entidade públika sira.

Diretór Ezekutivu ADTL, Cesario da Silva, hatete, PAN-EhD ne’e hanesan dokumentus ida ne’ebé importante, nune’e husu Governu liu husi Ministeriu relevante sira hotu, atu sosializa planu asaun ne’e ba diresaun hotu iha Ministeriu ida-idak.

Planu asaun nasional ne’ebé aprova, ADTL konsidera katak dokumentus esensial ida hanesan giaun ba dezenvolvimentu nasional.

“Ami mós hakarak husu atu halo sosializasaun ba diresaun relevante sira, tanba ami nia akompañamentu ba planu asaun nasional ema ho defisiensia ida dahuluk nia iha tinan 2014-2018 ne’e, Ministeriu relevante sira la-apar ho dokumentu ne’e rasik,”dehan nia iha konferensia imprensa iha salaun ADTL, Maskarenhas Balide, kuarta ne’e (13/10).

Tanba ne’e, ADTL husu ba Ministeriu relevante sira hotu atu haree ba iha planu asaun nasional ema ho defisiensia daruak nian ne’e, atu sira hotu bele apar, nune’e husu sira hotu atu sosializa. Ezemplo, Ministeriu Edukasaun, labele diresaun ida deit mak hatene kona ba planu asa  un ne’e, maibé diresaun hotu tenki intende.

Tanba inkluzasaun defisiente ne’e asuntu ka issu ne’ebé parte hotu ne’ebé presiza atu tau orsamentu ba planu ne’e rasik.

Ho nune’e, ADTL konsidera planu asaun nasional ne’e, dokumentu ida ne’ebé importante hodi sai hanesan matadalan ba planeamentu ba dezenvolvimentu Timor-Leste ida inkluzivu no sensibel ba asuntu defisiensia hodi atinji mehi no la husik ema ida hela iha kotuk.

 

Asistente Editor: Saturnina da Costa

Rate this item
(0 votes)