VIKEKE: Folin kombustível ne'ebé sa'e hahú fó impaktu ba setór transporte rai-maran. Motorista bis diresaun Dili-Vikeke unilateralmente hasa’e tarifa pasajeiru nian ba $10 ba ema ida.
Motorista ida, Octavio Palacio de Carvalho hatete, desizaun ne'e halo tanba folin kombustível ne'ebé kontinua sa'e, ne'ebé aumenta mós kustu operasionál sira.
"Komesa ohin, ami hahú hasa'e folin ba pasajeiru sira tanba mina folin sa'e, daudaun ne'e sa'e tiha ona $1.53 ne'ebé ami mós tenke aumenta folin ba pasajeiru. Se ami halo tuir de'it hanesan baibain ne'e ami lakon boot," dehan Octavio ba Jornalista Jornál INDEPENDENTE, Sabadu (04/04).
Nia esplika katak bainhira la ajusta tarefa, rendimentu ne’ebé sira hetan la sufisiente ona atu sosa kombustivel ka selu depózitu ba veíkulu na'in sira.
"Ami laiha opsaun seluk. Se ami la hasa'e ami-nia tarefa, ami sei labele kobre ami-nia kustu operasionál sira," dehan nia.
Varia tarefa foun
Ho ajustamentu sira ne'e, dadauk ne’e iha varia ba tarefa depende ba destinasaun:
- Dili – Assalatula/Larigutu: $8
- Dili -- Ossú – Loihunu: $9
- Dili -- Buanurak – Vikeke: $10
Todan ba pasajeiru sira
Iha parte seluk, pasajeiru sira hato’o sira-nia objesaun, maski sira komprende situasaun ne’e. Pasajeiru ida, Dominga da Silva hatete, aumentu tarefa ne'e todan tebes.
"Ami triste, maibé ami labele fó sala ba kondutór sira tanba folin kombustivel mak sa'e duni," nia hatete.
Governu seidauk aprova aumentu
Molok ne’e, iha 01 Abril 2026, Diresaun Nasionál Transporte no Terrestre (DNTT) informa, seidauk iha desizaun ofisiál kona-ba aumentu tarifa transporte nian.
Xefe Departamentu Apoiu Tékniku Administrativu, DNTT, Nelson Martins hatete, nia parte akompaña nafatin situasaun no husu ba kondutór sira atu labele hasa'e tarifa unilateralmente.
“Loos duni mina ita haree iha mudansa duni, maibé ita labele hasa'e buat ida tuir ita-nia gostu. Ita nasaun, ita tenke tuir regras ne'ebé mak iha, estadu mós sei la taka matan, karik iha mudansa estadu mós sei foti desizaun di'ak ba ita hotu," dehan nia.
Nia mós husu ba públiku atu hato’o keixa karik kondutór ruma hasa’e tarefa la ho aprovasaun governu nian, tantu ba polísia ka ba DNTT.
Tarefa ofisiál ne’ebé sei aplika
To'o ohin loron, tarefa ofisiál sira ne'ebé mak governu estabelese la muda, mak hanesan:
- Dili – Baukau: $4.
- Dili – Vikeke: $8
- Dili – Lautém: $8
- Dili – Manatuto: $2
- Dili – Maliana: $6.
- Dili – Likisa: $2
- Dili – Ermera: $3
- Dili – Aileu: $2
- Dili – Ainaro: $8
- Dili – Manufahi: $9
- Dili – Suai: $12
Governu subliña ona katak sei foti asaun bainhira presiza, maibé ba oras ne'e, husu ba públiku atu kontinua tuir tarefa ofisiál ne'ebé aplikavel.