Prezidente Komisaun Reguladóra Arte Marsiál, Octavio da Conceição hatete, IX Governu konstituisional suspende ona pratika atividade arte marsiál iha teritoriu laran tomak to’o iha 31 dezembru tinan ne’e, maibé membru organizasaun sira kontinua pratika atividade refere.

Tanba, Prezidente KRAM ne’e dehan, iha sabado foin lalais loron 07 fulan-Juñu tinan ne’e, Polisia Nasional Timor-Leste Munisipiu Aileu liu husi operasaun konjunta deteta no halo kapturasaun ba joven na’in neen ne’ebé halo viajen ba Na’in Feto Ramelau lori atributu arte marsiál nian.

“Ha’u bele dehan, sabdu fóin dadauk loron 7 fulan-Juñu tinan ne'e, iha Suku Lahae, Postu Administrativu Aileu, Komandu PNTL Aileu halo pasa revista iha Daisoli, ba joven sira ne'ebé maka hakarak ba halo viagen ba Nossa Senhora Ramelau no hafoin pasa revista Polisia kaptura joven na’in neen ne'ebé ho motorizada, sira uza atributu arte marsiál nian tau iha pasta laran, hodi halo jurus ou hatudu sira ninia atrasaun iha estrada laran,” dehan nia liu husi Konferensia Imprensa ne’ebé hala’o iha Salaun Dame, KRAM tersa (17/06/25).

Komisaun Reguladora Arte-Marsiál (KRAM) konsidera aktu sira ne’e viola lei no presiza duni iha medida husi autoridade atu aplika tuir lei, tanba Joven hirak ne’e desobedensia ba rezolusaun Governu nian  númeru 22/2025, 7 fulan-Abril, kona-bá medida suspensaun ba atividade ka pratika arte-marsiál iha territóriu nasionál.

Komisaun Reguladora Arte-Marsiál (KRAM) konsidera aktu sira-ne’e viola lei no presiza duni iha medida hosi autoridade atu aplika tuir lei.

Prezidente KRAM hatutan, iha fulan-ikus ne’e mós KRAM rekolla informasaun  autoridade Polísia halo operasaun konjunta no deteta membru arte marsiál sira kontinua la kolabora hodi pratika atividade arte marsiál sub-subar no mós iha segunda (16/06/25), PNTL liu husi Servisu Migrasaun prende farda lubuk ida husi organizasaun arte marsiál sira ne’ebé haruka mai husi rai liur.

Nune’e, mós iha publisidade balun ne’ebé hatudu estudante sekundaria sira balun ne’ebé la utiliza atributu arte marsiál nian maibé hakerek sira nia organizasaun nia naran iha sira farda eskola nian.

Tanba ne’e, KRAM husu ba direjente eskola sekundariu sira atu kontrola estudante sira ba eskola labele hakerek naran organizasaun arte marsiál  iha farda eskola nian.

Aliende ne’e mós KRAM husu ba lider organizasaun sira atu bele kontrola ninia membru sira atu kumpre rezolusaun ne’ebé governu fó sai ona, atu bele kontribui ba páz no estabilidade iha rai laran.

“Husu ba entidade sira, liu-liu dirijentes eskola sekundariu sira para atú kontrola estudante sira ba eskola, labele hakerek naran organizasaun arte marsiais iha farda eskola nian,”hakotu nia.