Print this page

MEJD-MS Tenke Koordena Inan-Aman Molok Oferese Pfizer ba Estudante

By Adelaide dos Santos Outubru 25, 2021 373
Estudante eskola 10 de Dezembru. Foto:INDEPENDENTE. Estudante eskola 10 de Dezembru. Foto:INDEPENDENTE.

DILI: Antes halo lansamentu ba vasinasaun Pfizer ba estudante ne’ebé ho tinan 12 to’o 17, parte eskola sira husu ba Ministériu Edukasaun Juventude no Desportu (MEJD) ho Ministériu Saúde (MS) tenke koordena ho inan-aman sira.

Adjuntu Diretór ESJ 4 Setembru, Câncio Soares, hateten MEJD ho MS tenke koordena ho inan-aman sira hodi bele kria enkontru ida, nune’e bele esplika ba sira antes oan sira simu vasina.

“Antes ita atu halo lansamentu ba vasinasaun Pfizer ba estudante sira, ita hakarak MEJD ho MS tenke koordena ho inan-aman sira hodi esplika klaru ba sira, nune’e labele iha dúvida,” nia hateten iha Balide, Sesta (22/10).

Bainhira estudante sira atu simu vasina, inan-aman mós tenke akompañia hodi asina deklarasaun, liuliu esplika kondisaun oan sira nian tanba balun iha moras komplikadu, nune’e parte saúde bele hatene no buka solusaun.

Agora daudaun dadus ba estudante sira ne’ebé ho tinan 12 to’o 17  atu simu vasina Pfizer ne’e eskola rekolla hotu ona no hein de’it atu simu vasina.

Estudante ho tinan 12 to’o 17 ne’ebé atu simu vasinasaun Pfizer iha eskola ne’e hamutuk 2.000, ho ida ne’e he’in de’it loron 27 Outobru sira simu vasina.

Molok ne’e, Diretora Saúde munisipiu Dili, Agostinha Segurado, hateten, objetivu husi koordenasaun ne’e atu bele prepara ba iha implementasaun kampanã vasina Pfizer kontra Covid-19.

Sei Lansa Pfizer iha ESJ 4 Setembru

MEJD liu husi Servisu Edukasaun Munisipiu Dili identifika ona Eskola Ensinu Sekundáriu Jerál (ESJ) 4 setembru,  sei sai fatin realizasaun lansamentu vasina Pfizer ba labarik sira ho tinan 12 to’o 17.

Diretor Edukasaun Munisipiu Dili Duarte Braganza hateten,  MEJD hili  ESJ 4 setembru mak sai fatin lansamentu ba vasina Pfizer, nune’e sai sentru ba eskola hotu iha Dili laran hodi ba vasina iha eskola refere.

Tuir dadus ne’ebé  MEJD rekolla ba labraik sira ne’ebé mak ho tinan 12 to’o 17 hamutuk 130.000 mak preparadu hodi simu vasinasaun, husi númeru ne’e kompostu husi estudante hamutuk 100.000 no labarik sira ne’ebé mak seidauk eskola hamutuk  30.000.

Rate this item
(0 votes)
Last modified on Segunda, 25 Outubru 2021 10:35