Suspensaun ba atividade aula prezensiál nee bazeia ba pedidu husi Serbisu Edukasaun Munisípiu Bobonado ba MEJD, tanba sentru saude Bobonaro identifika iha fatin rua nee maka kazu Covid-19 aumenta makás.

“Suspensaun atividade eskola nian tuir desizaun husi Ministeriu Edukasaun Juventude no Desportu (MEJD), liu husi despaixu númeru 46/GMEJD/XI/2021, hahú husi 02 to'o 16 fulan setembru ba eskola privada no publiku-sira,  iha postu-administrativu Maliana no Cailaco, nunee bele prevene an husi  Covid-19,” Diretór Serbisu Edukasaun Munisípiu Bobonaro, Crispim Moniz  hateten ba jornalista liu husi telephone, Sábadu (04/09).

Despaixu nee too iha postu-administrativu Atabae, Balibo, Bobonaro no Loloto'e, no aplika de'it iha postu-administrativu rua hanesan Maliana ho Cailaco neebé mak kazu Covid-19 aumenta kada loron.

Ministru Edukasaun Juventude no Desportu (MEJD) Armindo Maia hasai despaixu nee no asina iha loron 01 fulan setembru tinan 2021.

Evolusaun Covid-19 iha munisipiu Bobonaro hahú iha 02 Setembru, kazu detetadu foun hamutuk 16, kazu rekoperadu 11, kazu ativu 110, kumulativu rekoperadu 322,  no kumulativu kazu konfirmadu 438 inklui óbitu 6.