Nia dehan, kona ba menu variadade, konforme eskola sira nia planu, tanba maioria uza produtu lokal.

“Normalmente atividade la'o tuir planu ministeriu nian ne’ebé iha ona no menu ne'ebe atu tein, tuir manual kurrikular nian mak 75% tenki produtu lokal, ne’ebé mak hetan ona aprovasaun husi Ministeriu Saúde, manual orientasaun menu sira ne'e ita manda ona ba eskola ida-idak iha territorio laran tomak,”dehan nia ba Online INDEPENDENTE, iha nia knar fatin, ME, Vila-Verde, Dili, kuarta (18/09/25).

Enkuantu, relasiona ho menu merenda eskolar ikan ne’ebé lanu estudante na’in 16 iha Eskola Bázika Filial Budi ne’ebé lokaliza iha Batugade, Munisipiu Bobonaro, Diretór Nasional Asaun Eskolar no Sanitaria ne’e dehan, Ministeriu Edukasaun sei kolabora ho Ministeriu Saúde no mós Ministeriu Administrasaun Estatal atu bele fó formasaun ba fornesedor merenda eskolar sira atu bele halo fornese hahan ne’ebé saudavél ba estudante sira.  

“Ita servisu hamutuk ho ministeriu responsavel sira hotu, Ministeriu Saúde, Ministeriu Agrikultura, foin lalais depois akontesimentu ne’e ita mós halo kedas komunikasaun ho ministeriu relevante sira atu ba futuru oinsa ita bele halo formasaun ba ita nia fornesedor sira, atu nune’e prepara hahan ne’ebé diak, ezemplo hanesan ikan,  fornesedor sira tenke halo selesaun ba ikan ne’ebé maka diak no foun hela, atu labele fó prezudika ba labarik sira nia saúde,”tenik nia.

Entretantu, molok ne’e Ministru Administrasaun Estatal Tomas do Rosário Cabral hatete, iha tinan ida ne’e (2025), Governu aloka milaun $34 ba programa merenda eskolar.