Ministru ba Asuntu Kombatente Libertasaun Nasionál,  Gil da Costa Monteiro “Oan-Soru” informa, dadaun iha martír sira-ne’ebé mate klosan ne'ebé mak mate iha funu laran hamutuk 797, maibé to'o agora laiha família ida mak  mai halo reklamasaun iha ne'e atu bele asesu ba pensaun.

“Kombatente mate klosan ne'ebé ita sei atribui finanseira úniku ba sira. Iha dadus ne'ebé ita iha hamutuk 797. Maibé husi sira-ne'e ida seidauk mai rekere, sira mai pasti ita sei fo, sira agora mai ami mós bele fó, tanba hotu-hotu preparadu,” Dehan Ministru Gil da Costa Monteiro “Oan-Soru” ba Jornalista sira, iha nia kna'ar fatin, Komoro, Tersa (13/01).

Nia dehan, em-prinsipiu la iha familia ida mak mosu mai tanba ne'e Ministériu Asuntu Kombatentes Libertasaun Nasionál nafatin hein kuandu sira mai.

“Maibé em-prinsípiu sira-ne'e seidauk mosu mai. Ne'ebé ami hein, kuandu sira mai ona mak ami mós halo pagamentu ba sira,” Nia afirma.

Nia esplika, númeru iha baze de dadus mak ema hamutuk 797, maibé kuandu sira mai tenke komprova ho dokumentu, atu hatene  maun-alin duni ka la’e, Aman ho oan ka la'e?.

“Tanba dadus ne'ebé ativu hela ne’e to'o agora seidauk iha ema ida mak protesta, sira-ne'ebé mak atu mai rekere ne'e tenke lori dokumentu komprovativu hodi aprezenta ba ami. Tanba realidade ne'ebé iha, balun mai tuur tiha iha baze  dadus  oin, ami husu nia avo nia naran, nia lahatene. Ida-ne’e ami haruka fila depois mak ekipa ida buka hodi husu tuir,” Nia esplika.

Entaun, kona-ba sertidaun ema mate nian ho família ne’ebé atu simu osan ne'e, katak estrutura iha baze ne'e tenke justifikasaun tuir regra ne'ebé iha no mensiona iha Dekretu-Lei ne'e. Maibé ida mai ne'e tenke justifika iha nia dokumentu katak iha relasaun maun-alin ho ema martír mate ne'e.

“Nia mai tenke hatene ema mate nia naran ba martír ne'ebé mate klosan, inan-aman ka maun-alin bele simu  apoiu finanseiru unico hamutuk $10.000. Simu dala ida de’it no depoiz simu pagamentu hotu ona, la selu fulan-fulan,” Nia hakotu.