DILI: Tuir planu, hahú iha fulan Marsu ne’e, Diresaun Nasional Tranzitu Seguransa Rodaviaria, Polisia Nasional Timor-Leste, hamutuk ho Diresaun Nasional Transporte Terrestre sei halo operasaun hodi kontrola motor eletriku ne’ebé sirkula iha kapital Dili.

Operasaun ne’e halo hafoin DNTSR-PNTL asina nota kooperasaun ho DNTT kona-ba kontrolu ba movimentu motor eletriku.

Xefe Departamentu Koodenasaun Jestaun Risku, Formasaun Edukasaun Sivika, DNTSR-PNTL, Asistete Polísia Domingos Gama hatete, medida ne’e foti tanba movimentasaun motor eletrika ne’ebé aumenta maka’as no dala-barak envolve labarik sira ne’ebé la kumpre regra tranzitu.

“Dala-barak liu labarik menoridade mak sa’e.Dala-ruma tula ema rua ka tolu, no la kumpre ba iha Kóndigu Lei Estrada númeru 6/2003, lil-iu la uza kapasete no la respeita sinais trázitu,” dehan nia ba Jornalista sira, Segunda (16/03).

Ho preokupasaun ne’e, nia hatutan, iha semana hirak ba kotuk, CNTSR-PNTL ho DNTT realiza enkontru konjunta ida atu oinsa foti medida ba motor kiik sira.

Motór eletriku ne’e, nia hatutan, la la konsidera hanesan bisikleta, maibétanba iha kategoria motor siklu roda rua no roda tolu tuir Lei Kodigu Estrada nu.6/2003, artigu 101.

Tanba ne’e, utilizadór sira iha obrigatoriu atu tenke iha karta kondusaun, rejista veikulu no uza kapasete bainhira sirkula iha dalan publiku.

Kona-ba karta kondusaun, nia esplika, Lei Kódigu Estrada artigu 120,define kona-ba sidadaun sira ne’ebé bele asesu karta kondusaun, hahú ho idade tinan 16 ba kategória A1, no kategoria AB, C, no E ba sira ho idade husi tinan 18 ba leten.

“Kuaze iha kapitál Dili ita haree no observa labarik minoridade sira tinan 10 no tinan 11 sira komesa domina motór scuter,” dehan nia.

Tuir nia, velosidade husi motor eletrika ne’e kuaze atu hanesan ho motor baibain, tan ne’e hakarak ka lakohi DTSR ho DNTT tenke hola medidas.

“Atu avizu ba públiku, liu-liu ba inan-aman sira, atu sosa karik (motor eletriku) ba oan sira ne’ebé mak ho idade adultu, pelumenus 16 anos ba leten,” dehan nia.

Bainhira atu sosa motor ne’e, nia hatutan, tenke trata dokumentus no rejista iha DNTT atu bele kontrola ninian identidade.

“Ba labarik ne’ebé menoridade, bele karik inan-aman sira labele autoriza par utiliza motor scuter,” dehan nia.

Iha fulan oin, nia afirma, autoridade sei hahú operasaun.Karik deteta labarik sira uza motor eletrika, sei bolu inan-aman hodi halo deklarasaun.

Nia dehan, iha fulan oin husi Diresaun Tránzitu Seguransa Rodaviaria Nasionál hamutuk DNTTsei pasa revista kona ba dokuemntu sira husi motor scuter ne’e.

“Sescuter ne’e mak la rejistu,ita sei prende.Karik sira utiliza mak la utiliza kapatese mós ita sei prende. Karik ita identifika mak komete infrasaun ruma, nia koima ne’e hanesan ho motorizada baibain,” dehan nia.

Editor: Jorgino dos Santos