Embaixadór Manuel Antonio Araújo Serrano nu’udar distintu diplomata ho ninia karreira inklui knaar signifikativu sira iha fundasaun no mós iha governu, tanba serví ona nu'udar Prezidente "Fundasaun Xanana Gusmão" husi tinan 2002 to'o 2006, Xefe Gabinete ba Ministru Seniór no Ministru Negósiu Estranjeiru no Kooperasaun, José Ramos-Horta, husi tinan 2006 to'o 2008, Diretór ba Komisaun Amizade no Verdade (CAV) entre Timor-Leste no Indonézia, no nu'udar Konsul-Jerál RDTL nian iha Denpasar, Bali (2006-2008).
Ninia kargu diplomátiku aas liu maka nu'udar Embaixadór Estraordináriu no Plenipotensiáriu Repúblika Demokrátika Timor-Leste nian ba Repúblika Indonézia husi tinan 2009 to'o 2016. Foin lalais ne'e, Embaixador Manuel Serrano nu'udar Diretor-Jeral SNI iha Gabinete Primeiru-Ministru (2017-2021), no servisu nu'udar Konselleiru ba Vise-Primeiru-Ministru no Ministru Koordenador Asuntu Sosial no Asuntu Ekonomiku husi tinan 2023 to'o 2025.
Prezidente Ramos-Horta hato'o nia konfiansa katak Embaixadór Serrano nia esperiénsia diplomátika ne’ebé kle’an sei kontribui signifikativamente ba aprofundamentu relasaun bilaterál entre Timor-Leste no Portugál.
“Ita-nia relasaun ho Portugál hanesan pilár fundamentál ida ba ita-nia polítika esterna, ne’ebé harii iha istória, kultura, no lian partilhada. Embaixadór Serrano nia lideransa no abilidade diplomátika ne’ebé komprovadu sei sai instrumentál hodi avansa kooperasaun no promove oportunidade foun ba kolaborasaun,” Prezidente afirma liu husi Komunikadu ne’ebé Online ne’e asesu.
Entretantu, relasaun bilaterál entre Timor-Leste no Portugál nu’udar parseria profunda no multifasetadu, ho abut iha istória, lian, no kultura ne’ebé parthilada. Ligasaun ida-ne'e reforsa husi akordu bilaterál 77 no programa kooperasaun estratéjika ida ne’ebé ativu dezde 2011. Portugál nia apoiu indispensável iha setór krítiku sira hanesan edukasaun, justisa, no defeza, kombina ho diálogu polítiku ho nivel aas no konsistente, halo Timor-Leste sai parseiru internasionál ida ne’ebé vital no sustentável liu.
Enkuantu, nomeasaun ba embaixadór Manuel Antonio Araujo Serrano reafirma kompromisu Timor-Leste nian hodi hametin relasaun sira ne’e iha nível bilaterál no iha Komunidade País sira Lian Portugés (CPLP).