Primeiru-Ministru (PM) Malázia, Dato‘ Seri Anwar Bin Ibrahim Iha nia diskursu hatete, Parlamentu nu’udár forum aas-liu ne’ebé reprezenta povu nia lian no tane aas prinsípiu demokrátiku sira.

Tanba ne’e, instituisaun ida-ne’e presiza mantein no hametin an tuir dalan ne’ebé di’ak-liu, tantu iha Malázia, Timor-Leste ka nasaun seluk ne’ebé kampiaun bá demokrasia.

Demokrasia bazeia bá konfiansa ema nian, no hosi konfiansa ida-ne’e mosu estabilidade nasaun ida nian, ne’ebé hametin nia kna’ar nu’udár membru importante bá família ASEAN nian.

“Iha kontestu ida-ne’e, relasaun ne’ebé metin entre Malázia no Timor-Leste signifikativu tebes. Malázia iha kompromisu atu kontinua apoia Timor-Leste nia aspirasaun atu sai membru plenu ba ASEAN, tanba adezaun ida-ne’e la’ós de’it hametin unidade rejionál, maibé mós loke espasu ne’ebé lu’an liu-tán bá kooperasaun ekonómika, komérsiu, edukasaun no dezenvolvimentu teknolójiku,”dehan, Dato‘ Seri Anwar Bin Ibrahim liu husi komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Kurta (24/09).

Komunikandu haktuir, Relasiona ho dezafiu jeopolítiku atuál sira, ASEAN presiza interkonetividade ne'ebé maka'as liu no esplorasaun bá teknolojia foun sira, hanesan intelijénsia artifisiál no enerjia verde, nu'udár motór sira bá futuru ida ne'ebé inkluzivu no sustentável-liu bá rejiaun tomak.

Sesaun solene ne’e prezide direta hosi Prezidente Parlamentu Nasionál (PPN), Maria Fernanda Lay iha sala plenária, kuarta (24/09/2025) ne’ebé hahú ho hino nasionál nasaun rua nian, kontinua kedan ho deklarasaun politika hosi bankada CNRT, PD, FRETILIN, KHUNTO no PLP.

Partisipa iha sesaun solene ne’e Xefe Governu, Kay Rala Xanana Gusmão, membru Governu sira no konvidadu sira.