Print this page

MAE-SEPS Evakua Komunidade Iha Area Tasi Ninin Ba Fatin Seguru Featured

By Saturnina da Costa Maiu 29, 2021 324
Diretór Jéral Desenvolvimento Rural, Rosito Guterres, konversa hela ho vitima sira fatin evakuasaun. Foto:Gab DJDR. Diretór Jéral Desenvolvimento Rural, Rosito Guterres, konversa hela ho vitima sira fatin evakuasaun. Foto:Gab DJDR.

DILI:Ministériu Administrasaun Estatal (MAE) liu husi Diresaun Jéral Dezenvolvimentu Rural hamutuk ho Sekretariu Estadu Protesaun Sivil (SEPS) evakua komunidade sira ne’ebé hela besik area tasi ninin ba fatin seguru, tanba akontese anin bo’ot halo tasi-been sa’e iha pantai kelapa iha loron (28/05).

Ho akontesementu ne’e halo komunidade sira iha area pantai kelapa, Bebonuk no Comoro no Tasi-Tolu pániku.

Tanba ne’e, komunidade iha Aldeia Metin 1, 2 no 3 Suku Bebonuk mak hetan tasi tama sira nia uma.

Diretór Jéral Desenvolvimento Rural, Rosito Guterres hatete,  hafoin akontesementu, MAE hamutuk ho Adjunto Prezidente Autoridade Munisípiu Dili no mós ekipa responsavel operasionais SEPS, hodi kordena ho Xefe Suku no Xefe Aldeia, halo kedas intervensaun no tun direita ba terenu hodi evakua komunidade afeitadu sira ba fatin evakuasaun eskola Ensino Básico Filial No-02 Bebonuk iha oras tuku 17:00.

“Governu nian obrigasaun premeiru mak alerta hodi garantia ita bo’ot sira ses husi fatin risku dezastre, no hahú ohin ba oin, Sekretáriu Estadu Protesaun Sivil, MSSI no MAE kontinua koordena hodi responde ho medidas emerjénsia ba loron-tolu ,hodi oferese ai-han tasak,”dehan nia iha komunikadu ne’ebé Online INDEPENDENTE aseseu, (29/05).

Hafoin, kontinua rona instrusaun husi autoridade meteorolójia no Geofisika sobre inklima loron hira ba oin, nudar meius antisipasaun.

Entretantu, MAE no SEPS halo koordenasaun mós ho ajensia Intenrasional sira hanesan PARTISIPA, CVTL no parseira sira seluk hodi instala kondisaun sira hanesan be’e mos, sintina públiku, ekipamentus toba fatin no nesesidade urgensia sira.

Tuir planu ekipa operasioanal sei kontinua koordena ho entidade relevantes kona-ba planu re-alojamentu komunidade sira ne’ebé evakua tanba paniku.

Rosito hatutan, SEPS mak sei sai liña dahuluk hodi responde ba situasaun emerjensia sira ho koordenasaun MSSI no MAE. Importante mak komunidade sira hanesan inan no labarik, ema idozos, no maluk defisiensia sira tenke evakua uluk ba fatin seguru.

MAE halo ona Koordenasaun ho SEPC no MSSI atu hahú sabadu ohin (29/05) , ba oin sei toma medidas emerjensia no medidas kurtu prazu sira tuir mai

Bazeia ba observasaun, dadus provizória to’o tuku 17:45 total  Xefe Família hamutuk  61, komunidade mane iha na’in 157, feto na’in 142, inan ne’ebé fó susun-oan iha na’in 17, inan isin-rua 11, bebe ho idade fulan 0-11 hamutuk 10, no bebe ho idade 1-5 hamutuk 43 mak iha ona fatin evakuasaun.

Direktur Geral Protesaun Sivil Supretendenti Ismael da Costa Babo, informa vitima sira ne’e hetan ona apoiu emerjensia hanesan, biti 60, kulisaun 10, lona 10, manta 60 no hahan tasak.

 

Asistente Editor: Saturnina da Costa

Rate this item
(0 votes)