Ministru Administrasaun Estatal, Miguel de Carvalho hatete, kualker planu governu nian atu reordena sidade nia iha sekuensia tenke utiliza rai, atu muda populasaun sira ne'ebe hela iha rai Estadu ka areador eskola.

"Relasiona ho ita-nia populasaun sira ne'ebe mak okupa hela areador eskola nian hodi sai preokupasaun ba estudante sira hodi aprende inklui mos ba ita nia vitima ba inundasaun sira ne'ebe to'o agora  seidauk hetan fatin, ho ida ne'e ita ona planu hodi estabelese sentru multi-funsaun ne'ebé sei konstrui iha Hera," dehan nia, iha Likisa, Sesta (16/9).

Ho ida ne'e, governu sei halo esforsu atu kria kondisaun hodi bele garantia populasaun sira ne'ebe okupa areador eskola nian.

Tanba ne'e, MAE estabelese ona sentru akollamentu multi funsaun, ne'ebe sei konstrui iha Hera, atu akontese situasaun ruma bele muda temporariamente, hodi bele tranzita sira ba iha fatin ne'ebe apropriadu.

"Ita iha ona planu no Ami mos kordena ona ho MEJD, hodi hare'e ba kestaun hirak ne'ebe mak afeita ba Ita Nia estudante sira," dehan nia.

Molok ne'e, Kordenador Administrasaun no Edukasaun, Sabino Mendonça hateten, Estadu no governu presiza halo kontrolu máximu ba komunidade sira, ne'ebe hela iha areadór eskola nian.

"Komunidade sira ne'ebe mak nafatin okupa areadores eskola nian, desde  uluk kedas ita ukun an nia akontese ona tuir ita hatene katak kleur ona estadu mos mensiona kona ba ida ne'e, atu ema labele hela iha areadores eskola nian maibe kuaze iha eskola barak mak sei nafatin hanesan ne'e, no Agora dadaun komunidade sira utiliza rai Estadu hodi loke kost," dehan nia.

Nia dehan, antes ne'e  governu halo ona aproximasaun atu ema labele okupa areador eskola nian, maibe ne'e sei mantein nafatin to'o agora, tanba ne'e presiza aproximasaun propriu,  presiza politika ida atu bele propoin ema labele okupa areador eskola.

Ho ida ne'e, sosiedade sivil ladún iha kosistensia husi parte estadu nian, atu bele halo kontrolu tenke iha konsistensia katak bainhira hala'o aproximasaun atu hasai pressiza konsistensia kontrolu.

Nia dehan, dala-ruma rai estadu nian balun estadu hasai ona, maibe tanba la iha konsistensia kontrolu husi estadu rasik entaun ema balu sai husi fatin ne'e no balun ba okupa fila fali.

Nia hatutan, karik politika konsistensia kontrolu husi estadu mak la dun di’ak nune'e ema mantein nafatin to'o oras ne'e, karik iha lei ruma ne'ebe mak tenke propoin ema la bele hela.

Ho ida ne'e, presiza halo aproximasaun  propriu no konsistente labele ko'alia depois para, dala-ruma ko'alia tinan rua -tolu mak foin ba halo fali aproximasaun, maibe laiha konsistensia atu bele dehan fatin ne'e la bele hela tanba laiha konsistensia kontrolu husi Estadu rasik nune'e ema mantein nafatin hela iha areador eskola.