Portavos Estudante Universitariu Timor-Leste (EUTL), Natalício Nunes informa, iha 30 Setembru ne’e, nia parte sei submete tan karta ba Parlamentu Nasionál (PN) atu inisia prosesu alterasaun ba lei númeru 1/2006 kona-ba Liberdade Reuniaun no Manifestasaun.

“Estudante sira ne'ebé hamahan an iha movimentu universitariu Timor-Leste sei hato'o karta informativu ida ba parlamentu nasionál atu bele inisia ona prosesu alterasaun ba lei númeru 1/2006 kona-ba liberdade reuniaun no manifestasaun nian," dehan Natalicio ba jornalista sira, iha UNTL, Segunda (29/09).

Ezijensia ba alterasaun ne’e, nia dehan, hola parte iha pontus ezijensia ne’ebé EUTL hato’o durante manifestasaun iha 15 to’o 17 Setembru ne’e.

“Ezijensia primeiro mak kansela sosa kareta pardo; Ezijensia segundo mak ohin PR promulga ona—lei pensaun mensal vitalisia; Ezijensia terseiro mak lei manifestasaun ne'ebe parlamentu nasionál seidauk halo alterasaun; no quarto mak alokasaun orsamentu ba setor produtivu sira,” nia fó hanoin.

Ba lei liberdade reuniaun no manifestasaun, Natalicio dehan, EUTL nia ezijensia foku liu ba distansia manifestasaun nian husi edifisiu públiku sira.

"Tanba ne'e ita husu ba oin atu bele akompaña nafatin situasaun sira, atu bele kontribui ba luta ida ne'e, no ikus ita bele iha rezultadu ne'ebé di'ak no pozitivu ba ita-nia povu no nasaun," katak nia.

Portavos ne'e dehan, EUTL kontinua reziste nu’udar kontrolu sosial.