Diretór Servisu Saúde Munisípiu Ermera António de Deus informa, tuir dadus ne’ebé iha, husi 01 to’o 28 Janeiru, SSM Ermera rejista kazu dengue 147.

Ba total kazu husi Janeiru to’o 09 Fevereiru, nia dehan, ho total 203, kompostu husi mane na’in 99 no feto na’in 104.

"Idade ne'ebé mak afeita ne'e tinan ida to'o tinan 24. Kuaze pasiente sira rekupera hotu, maibé agora ita rujuk ba HNVG hamutuk 39.Kona-ba lakon vida provizoriumente daudaun ne'e ami seidauk rejistu,” dehan António via telefone, Tersa(10/09).

Enkuantu, daudaun ne’e pasiente na’in 8 mak sei kontinua hala’o tratamentu saude iha internamentu Gleno.

Ba pasiente ne’ebé transfere ba Hospital Nasionál Guido Valadares, nia dehan, laos ho kondisaun grave, maibé tanba reazente maka liu ona prazu nune’e SSM Ermera deside hodi haruka ba Dili.

Iha fatin ketak, Diretór Servisu Saúde Munisípiu Aileu, João de Deus infoma, kazu dengue ne’ebé SSM Aileu rejista husi 01 Janeiru to'o 09 Fevereiru hamutuk 50.

"Maioria husi Postu Administrativu Aileu Vila, na'in 32, Postu Administrativu Remexiu na’in 9, Laulara na’in 9,” dehan nia.

Iha fatin ketak, Prezidente Autoridade Munisípiu Díli, Francisco dos Santos, apela ba komunidade atu partisipa ativu hamoos ambiente, hodi prevene moras dengue.

Tuir Prezidente Autoridade ne’e, moras dengue la’ós preokupasaun Governu de’it, maibé responsabilidade ema hotu.

“Komunidade mak ita hotu ne’ebé moris iha Díli. Ita tenke hamoos uma huun, valeta, no fatin foer sira. Governu halo fumigasaun, maibé prevene tenke hahu husi ita rasik,” dehan PAM Díli ne’e.

Francisco mós apela ba jovem sira atu envolvimentu diretu iha kampaña limpeza, hodi hametin ambiente moos no saudável, nune’e bele prevene surtu dengue iha kapitál Díli.

Dadus dengue iha HNGV

Iha loron neen ikus, husi 03 to’o 09 Fevereiru, ema na’in 152 tama Hospital Nasionál Guido Valadares tanba sofre moras dengue. Númeru ne’e hanesan mós ho medida pasiente na’in 25 kada loron, ne’ebé indika iha aumentu kazu dengue.

Tuir dadus, husi 01 Janeiru to’o 02 Fevereiru 2026, HNGV rejista kazu dengue 383, no to’o iha 09 Fevereiru, horseik, kazu dengue ne’ebé rejista sa’e ba 535. Signifika, iha loron neen nia laran, iha aumentu kazu 152.

"Kazu dengue nian ne'e hahú husi dia 01 de Janeiru até dia 02 Fevereiru 2026, ne'e totál hamutuk 383 kazus,” informa Diretór Servisu Apoiu Diagnóstiku no Terapeutiku, HNVG, Vidal de Jesus Lopes, Segunda (02/09).

Enkuantu, tuir dadus atual ne’ebé Diretór Vidal fó sai iha 09 Fevereiru, horseik, total númeru kazu dengue sa’e ona ba 535.

"Dadus dengue hahú husi 01 Janeiru to'o 09 ohin (horseik), dadus dengue ne'ebé mak rejistradu ka baixa no balun ne'ebé mak fila uma ona hamutuk 535,” dehan nia.

Husi númeru kazu ne’e, Vida hatete, na’in hitu mak lakon vida, na’in 111 mak kontinua halo tratamentu iha HNGV, no na’in 417 mak alta ona.

“Ida agora daudaun atuál baixa ne'e hamutuk 111 no seluk ne'e alta hotu ona, husi 535 totál mate ne'e na'in hitu,” dehan nia iha nia knar-fatin.

Husi na’in 111 ne’ebé baixa, nia dehan, na’in 78 baixa iha HNGV no na’in 43 transfere on aba fiel ospitál Tasi Tolu.

“Sira ne'ebé mak baixa ne'e ho kondisaun balun garve, balun tama ona shock, balun tama ona handmorazia tuun. Sira garve ne'e hotu-hotu baixa iha HNVG no ida kategoria kaman mak ba hotu iha fiel ospitál Tasi Tolu,” dehan nia.

Enkuantu, husi pasiente hirak ne’ebé rejistu, na’in 18 mak ema boot ka adultu, enkuantu maioria labarik ho idade husi tinan 14 ba kraik.

"Husi dadus sira ne'e pasiente barak liu mai husi Munisípiu Dili mak rejistu aas liu, tuir fali mak Ermera no Likisá,” dehan nia.