Prezidente liga futeból Timor-Leste, Ipolito Soares informa, partisipasaun klube 40 hatudu maioria joven iha espíritu desportiva hakarak apoia no partisipa direta iha kampu, nune'e hasa'e kualidade kompetisaun no futuru iha jogadór ne'ebé kualifikadu iha selesaun nasionál Timor-Leste.

“Órgaun Liga sente onradu, tanba iha klube 40 neʼebé entuziasmu hola-parte iha apuramentu segunda divizaun,” Informa Prezidente LFTL,  Ipolito,  iha sede LFTL, Kaikoli, Kuarta (19/11).

Lideransa masimu  LFTL ne'e hatutan, durante faze apuramentu klubu sira sei kompete hodi rezulta klube lima mak iha direitu ba tikete, nune'e kompleta tan klube lima seluk ne'ebé atuál iha ona segunda divizaun, nune'e époka 2026 klubu sanulu mak sei kompete iha segunda divizaun.

Aleinde ne'e, durante faze apuramentu sei aloka orsamentu hamutuk rihun $40 ne'ebé kontribui husi klube 40 ne'ebé sei gastu ba kustu operasionál hanesan manutensaun kampu no pagamentu árbitu.

“Kompetisaun segunda divizaun klube sira tenke kompete tuir regra ne'ebé estabelesidu ona,” Ipolito akresenta.

Tuir planu LFTL, sei realiza kompetisaun iha 26 Novembru no sei termina iha Janeiru tinan-2026 no sei utiliza kampu haat kompostu kampu Metinaro, Hera, Fatuhada, enkuantu kampu ida hanesan DIT ka Lalenok FC mak sei iha faze konfirmasaun.

Purtantu, Klube 40 ne'ebé kompete iha faze apuramentu kompostu mak hanesan, ADR União, Mamura, YMCA Komoro, Fc Lero, Karai Fuik Fc, Relay Fc, Kuda Ulun Fc, Laisorulai Fc, Ad Santo António, Warik Oan Fc, São José Fc, B2B, Altletico Mota-ain, Sousa United Fc As Kantada, Fc Ostiko.

Klubu Assa Fc, Rai-klaran Fc, Ablai Fc, Filma Fc, Ad Bas, Fc Ira-Pua, Belta Tres Fc, As Rai-metin, Fc Natura, Akademia Hera, Fc Vila Ataúro, Hibers Dili Fc, Maudoko Fc, Tatamailau Fc, Covalima Fc, Aimo Fc, Fatunsa Fc, Unidus Fc, Leopa Fc, Dark Blue Fc, Weasel Fc, Mota-Bandeira Fc, Saralima Fc no Naimeko Fc.