Diretór Ezekutivu Empreza Esperansa Timoroan (ETO), Nilton Telmo Gusmão, empreza ETO garante stock kombustível  ne’ebé sufisiente to'o fulan haat ba oin.

Nia dehan, funu iha médiu oriente sei lori impaktu boot ba petrolífera, tanba refenaria barak depende ba mina matan iha nasaun país médiu oriente ni’an.

 “Ita hatene funu iha Médiu oriente hanesan funu ida ne'ebe sei lori impaktu boot ba atividade Petrólifera iha mundu tomak, maibé ba ita nia stock kombustível sufisiente hela, tanba iha domingu semana liu ba, ha'u ba Singapura ko'alia ho ema, tau prioridade ba timor atu lori kombustível mai,” Katak ba nia jornalista sira, iha salaun City  8 Manleuana, Kinta (05/0).

Nilton komfirma katak, iha loron-09 fulan ne'e, sei iha loron ida mak lori kombustível mai, atu asegura ba fulan haat ba oin. Maibe la signifika situasaun ne'e atu di'ak de'it.

“Hanesan importador ha'u garante katak, ita sei laiha problema husi ohin ba to'o fulan haat mai oin. Ida ne'e la signifika katak situasaun pior ita atu iha de'it, klaru ita mos sei hetan impaktu, maibe ita iha situasaun ida normal hela no ita kontinua komunika ho ita nia fornesedor sira atu asegura kombustível ba ita nia rain,” Nia esplika.

Iha biban hanesan, Prezidente Autoridade Petróleu, Gualdino do  Carmo da Silva, reforsa, ANP kontinua komunika ho importador sira ba kombustível nian, atu kontinua forñese kombustível ba públiku.

“Ita importa mina husi nasaun lubuk ida, Indonézia, Singapura no mos India, tan ne'e ita kontinua halo ligasaun ho  ita nia fornesedor sira, atu garante nafatin fornesimentu kombustível ba ita nia publiku,” Gualdino afirma.

Nia afirma, dadaun ne'e stock mina di'ak hela, tanba kalendáriu ba atu importa kombustível mai fiksu, no hein katak buat hotu lao tuir planu.

"Sim ida iha dadus, ita tuir kapasidade tanki ne'ebe iha minimu sei sufisiente ba fulan rua ba oin, no mos kalendáriu ro atu tama fiksu hotu ona ita hein katak buat hotu lao di'ak tuir saida mak fornesedor sira hato'o mai ANP,” Katak nia.

Nia hatutan, ANP kontinua halo monitorizaun, hodi akompaña mudansa presu iha Timor-Leste no nasaun seluk.

“Ita haree katak iha ona sinais ruma, la’os iha Timor de'it, maibe iha nasaun seluk mudansa presu, enkuantu ita sei akompaña nafatin ho ita nia fornesedor sira, atu iha presu mudansa ruma karik nafatin razoavel ba ita nia komunidade sira,” Nia hakotu.