Prezidente KSTL, Almerio Villa Nova hatete,  KSTL  hato’o  nia  lamentasaun   Adidu  Traballu  Timor-Leste iha Korea do Súl nia servisu hodi kontrola ba traballadorTimor-oan sira, tanba   traballador Timor-Oan barak servisu  iha área  risku nia-laran.

“Ita nia  Adidu Traballu sira  ne'ebá  ladun  hala’o  nia  servisu  supersiona kondisaun  traballu iha Korea do Súl, tanba  Adidu Traballu Timor-Leste iha Korea do  Súl ladun  halo  kontrola ba empregador sira  iha ne'ebá,”  Dehan nia ba Jornalista INDEPENDENTE, Sexta (16/01).

Nia haktuir, depois Adidu Traballu  tenke halo  kontrola kondisaun servisu  husi empregador sira kona-ba ekipamentu  protesaun nian  no  fó formasaun trabalhadór Timor-Oan sira, molok  sira  tun ba   hodi  ka’er  iha tasi  ni’an.

Aliende ne’e,  Adidu Traballu Timor-Leste iha Korea do Súl   kontrola  empregador  sira, atu  asegura   ekipamentu sira iha servisu  fatin,  atu  nune'e prevene traballador Timor-oan sira  monu ba risku  iha área  peska.

Nia afirma, kuandu  Timor-oan  sira  servisu  laiha saude ho seguransa  iha servisu fatin, ne’e perigozu  tebes ba sira,  tanba  empregador balun  la aplika kondisaun sira  kona-ba estandar  seguransa iha servisu fatin.

Nia husu ba Adidu Traballu Timor-Leste iha Korea do Sul  tenke halo  kontrola másimu ba empregador sira,  ne'ebé Adidu Traballu koko halo  negosiasaun  ho empregador sira  kona-ba saude ho seguransa no mos sira seluk tan.

“Kestaun  la’os tenta atu  servisu deit  no haruka joven sira ba Korea do Súl importante servisu  de’it,  maibé  ema  nia  vida importante  bainhira hala’o servisu  liu-liu iha área peska ni’an,” Kata nia.

Nia reforsa, Governu  iha responsabilidade moral atu asegura trabalhador Timor-oan sira hotu haruka ba servisu iha Korea do Súl,  maibé traballador tenke hala’o servisu seguru no saudável.

“Dala barak  familia  sira rona  katak  oan  balun  lakon  vida iha Korea do Súl  iha area  peska nia no to'o ikus  familia sira  simu  ho mata -ween  tanba  sira lakon vida. Adidu Traballu Timor-Leste iha Korea do Súl  manan  osan  boot,  depois la asegura trabalhador Timor-oan sira servisu ho seguru, entaun Adidu Traballu tau iha ne'ebá atu halo  saida?,” Tenik nia.

Nia mos husu  ba Governu  liu husi SEFOPE  hahú prosesu halo rekrutamentu  koloka  joven sira -ne'ebé atu  ba servisu iha rai liur tenke  tuir nia kualifikasaun.  Bainhira  trabalhador Timor-oan ida  iha kualifikasaun  iha peska  karik,  entaun  bele ba servisu iha área  peska nian.

“Ita tenke tau  ema  iha fatin  ne'ebé loos, atu  nune'e nia servisu karik  labele akontese  dezastre  ezemplu hanesan  iha tasi-laran,  servisu iha  risku,” Nia informa.

Tán ne’e, KSTL husu  Governu  kooperasaun  sira  ne'ebé  iha kapasidade, atu  tuir  formasaun kona-ba  área  peska  nia no molok  haruka Timor-oan ba servisu iha Korea  do Súl.