PM Xanana afirma katak, fasilidade ne’e laos de’it atu hanorin tekniku desportu, maibé importante liu atu forma labarik sira-nia karate no dezenvolve sira-nia abilidade.

"Desportu laos ba buka vitoria, maibé ita buka atu forma karakter labarik sira nian, atu sai sidadaun ne'ebe di'ak. Tanba kuandu laiha atensaun ba desportu hanesan área formasaun karater ba labarik sira, sei mosu artemarsiais iha media ne'ebé fahe labarik sira, no tau iha labarik sira-nia ulun hodi ba buka baku malu no oho malu," dehan PM Xanana iha inaugurasaun ba sentru desportu ne’e, Tersa (03/02).

Xefe governu ne’e mós husu ba komunidade sira atu tau-matan no kuidadu sentru desportu ne’e.

"Ami husu ba ita-boot sira, kontrola imi-nia joven sira atu labele estraga kampu ne'e. Tanba kampu ne'e ba sira," dehan Xanana.

PM Xanana mos agradese ba governu Korea liu husi ajensia KOICA ne’ebé apoiu ona sentru treinamentu ne’e ba dezenvolvimentu desportu Timor-Leste.

Sentru desportu ne’e kompleta ho kampu desportu, aula futebol, no espasu ba komunidade ne’ebé bele akumula ema rihun ida resin.

Iha fatin hanesan, Prezidente KOICA, Chang Won Sam, agradese bá parte hotu-hotu ne’ebé servisu di’ak hodi finaliza projetu refere.

Tuir nia, dezde 2010, KOICA servisu hamutuk ho governu Timor-Leste iha setor oioin, inklui seitór saúde, dezenvolvimentu labarik no foin-sa’e, formasaun vokasionál, agrikultura, mudansa klimátika, no seluk tán.

"Entre projetu sira ne’e hotu, projetu dezenvolvimentu labarik liu husi desportu ne’ebé ohin ita inagura sai nu’udár projetu importante tebes ba dezenvolvimentu saúde foinsa’e sira nian no mós sira-nia espiritu," nia dehan.

Nia hatutan, Sentru desportivu amizade Korea-Timor-Leste sai ezemplu dahuluk iha Timor-Leste, tanba hetan apoiu husi doadór ne’ebé harii kampu desportiva no fasilidade sira seluk ho padraun internasionál.

Ministru Juventude, Desportu, Arte no Kultura, Nelio Isaac Sarmento hatutan, treinamentu iha sentru ne’e halo iha faze rua. Faze dahuluk ba sira ne'ebé foin iha karater atu koñese bola, enkuantu faze daruak ba sira ne’ebé hatene ona atu bele dezenvolve liu tan.

“Tan ne'e ita sei iha orariu kompleitu. Orariu komesa husi labarik sira ne'ebé eskola dader, sira mai joga iha lokraik to’o kalan, no labarik sira ne'ebé eskola lokraik treinu iha dader," dehan nia.

Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (04/02).