Tanba ne’e haree ba progreseu, Governu Timor-Leste liuhusi Escrow Account Fundu Viabilidade ne’ebé jere husi Ministériu Finansas (MF) hahú husi fulan-Augustu tinan 2019 to’o fulan-Maiu tinan 2021, halo ona pagamentu Viability Gap Fund (VGF, sigla Inglés) ho valór dolar amerikanu millaun $64,7 ba kompaña Timor-Port S.A, ne’ebé hanesan konsesionáriu projetu Parseria Públika-Privada (PPP, sigla Inglés) Portu Baía Tibar.

Enkuantu, Bainhira ramata no hahú halo operasaun, Portu foun no modernu ne’e, sei fasilita movimentu importasaun no esportasaun sasán-sira, redus atrazu, kustu tranzasaun inklui tempu libertasaun kontentór, hodi bele fasilita di’ak liután empreza-sira no atividades komérsiu.

“Operasaun Portu Baía Tibar ne’e sei fasilita efisiénsia iha servisu alfandegáriu, ne’ebé konsidera hanesan pasu importante ida ba MF iha ámbitu Reforma Fiskál no Jestaun Finansas Públiku ne’ebé hahú ona dezde 2015,”dehan iha komunikadu ne’ebé Online INDEPENDENTE asesu, segunda ohin (31/05).

Efisiénsia hirak ne’e mós sei ajuda Governu liuhusi MF no mós utilizadór Portu hanesan importador sira atu kolekta reseitas ho maneira ida ne’ebé lais, justu no transparente.

Portu foun no modernu ne’e sei inklui ka’is ida ho bersus rua no terminál kontentór ho kapasidade movimentasaun kontentór hamutuk millaun ida kada tinan.

Portu ne’e sei liga Timor-Leste ba merkadu komérsiu globál no sei hasa’e liután Timor-Leste nia asesu komérsiu ba merkadoria sira hanesan agrikultura, turizmu, peskas, pekuária no mós indústria sira seluk, hanesan dalan ida atu ajuda Timor-Leste diversifika nia produsaun.

Aleinde ne’e, operasaun Portu ne’e sei fasilita Timor-Leste nia konektividade maritima iha rejiaun Ázia no seluk.

To’o iha fulan-fevereiru, 2021, kompaña China Harbour ne’ebé hetan kontratu husi kompaña Timor Port hodi halo konstrusaun, sub-kontrata ona servisu balun ba kompaña 61 ho montante osan millaun $20,4.

Husi totál kompaña 61 ne’e, kompaña lokál 39, kompaña internasionál ne’ebé estabelese iha Timor-Leste 21 no kompaña internasionál 1.

Konstrusaun ne’e fó ona benefísiu direta no indireta ba traballadór Timor-oan hamutuk pesoál 375.

Daudaun ne’e, totál traballadór-sira ne’ebé mak servisu iha projetu konstrusaun Portu Baía Tibar hamutuk pesoál 1.134, husi númeru ne’e, traballadór Timoroan hamutuk pesoál 691 (60.93%).

Konsesionáriu Timor Port, Independent Engineer, Unidade Jestaun Projetu, Portu Baía Tibar no Autoridade Nasionál ba Lisensiamentu Ambientál (ANLA), periódiku halo monitorizasaun ba impaktu ambientál no konforme relatóriu mensál ne’ebé submete husi Konsesionáriu nomós inspesaun husi ANLA relata katak laiha impaktu bo’ot ba ambientál ho indikadór konstrusaun Portu Baía Tibar  ka zero kazu polusaun ambientál no zero lixu perigozu.

Relasiona ho dezenvolvimentu konteúdu lokál ba fatin rekreativu no desportivu (bluezone), konsesionáriu Timor Port sei implementa iha períodu konstrusaun nia laran.

Nune’e, ekipa husi unidade Jestaun Projetu, Portu Baía Tibar mós halo hela diskusaun ho Ministériu Edukasaun atu asegura fatin iha Eskola Primária Cassait, Ulmera hanesan fatin Bluezone ba tempu naruk atu bele sustentável.

Konstrusaun Portu Baía Tibar ho modalidade PPP husi parseria entre Governu Timor-Leste ne’ebé aloka dolar amerikanu millaun $130 iha Fundu Viabilidade  no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Projetu ne’e hanesan projetu interese públiku ne’ebé lidera husi Komisaun Interministeriál ho nia membru atuál mak Ministru Finansas, Ministru Obras Públikas, Ministru Planu no Ordenamentu no Ministru Transporte no Komunikasaun.

Asistente Editor: Saturnina da Costa