Komisariu Rui hato’o kestaun ne’e, iha 09 Janeiru 2025, iha serimonia natal hamutuk entre investigador KAK nian, iha edifisiu sentral Farol, Dili.

Komisariu Rui husu ba investigador sira atu halao servisu tuir regras no prosedimentu investigasaun nian ho profisional, no husik Komisariu KAK ho nia adjuntu sira mak hasoru presaun politika.

“Hanesan ha'u hatete fila-fila ona katak imi nain hira halao servisu ho profissional de’it. Husik presaun politika ne’e Komisariu ho Komisariu Adjuntu sira mak hatan. Importante imi halo tuir regras no prosedimentus sira, ita [kontinua] la’o nafatin", dehan Rui iha ninian intervensaun ne’ebé Jornal INDEPENDENTE asesu, Kuarta (14/01).

Nia informa, KAK hakerek ona karta ofisial ida ba Prokurador Jeral Republika, Nelson de Carvalho, atu konvoka enkountru kortezia ida entre PJR ho orgaun polisial hanesan KAK, PSIK no PNSIK kona-ba publikasaun servisu orgaun polisial nian iha tinan 2025.

“Ita (KAK) lakohi presaun [politika] mai husi Ministeriu Publiku dezanima tiha ita-nia vontade servisu ninian,” katak nia.

Komisariu mós garante katak, KAK nia orsamentu sufisiente atu investigador sira hala'o servisu investigasaun nian tuir regras no prosedimentu.

Nia husu ba investigador sira atu halao servisu investigasaun ho etika no integridade, liu-liu bainhira iha kazu ruma envolve membru familia ka iha relasaun pesoal ho investigador ruma.

Iha situasaun hanesan ne’e, nia hatutan, investigadór tenke ho konsensia tomak retira an husi prosesu no fó ba investigador seluk atu halo investigasaun hodi evita konflitu interese.

“KAK tenke sai ezemplu ba integridade no transparensia. Ida ne’e importante atu mantein fiar publiku nian ba instituisaun,” dehan Komisariu Rui.