Iha selebrasaun  aniversáriu ne’e hahú ho misa agradesimentu iha igreza Balide ne’ebé prezide husi Padre Angelo Salsina.

Iha Omília, Padre Angelo Salsina, parabeniza ezisténsia  FDCH no husu ba FDCH atu servisu ho di’ak liutan, mantéin profisionalizmu, servisu ho honestidade no responsabilidade hodi atende publiku liga ho programa sira ne’ebé ohin loron iha.

Hafoin de misa,  Prezidente Konsellu Administrasaun FDCH, Atuál Ministru Planeamentu  Investimentu Estratéjiku, Gastão Francisco de Sousa, Membru Konsellu Administrasaun, atual  Ministru Ensinu Superior, Siensia no Kultura, José Honório da Costa Pereira Jerónimo,  Diretór Ezekutivu FDCH, Júlio Aparício, Diretór Adjuntu, Rogerio Inacio S. Miranda Lay,  Kargu Koordenadores, Xefe Unidade, Asesor sira no funsionáriu sira hotu, Dirijente sira husi MPIE halibur hamutuk iha salaun Multiuzu GMN, Bebora hodi selebra aniversáriu ezisténsia FDCH ni’an,  hodi motiva no enkoraza fúnsionáriu sira atu presta servisu ho di’ak liu tan, hodi kontribui ba dezenvolvimentu rekursus umanus Timor-Leste, haktuir ba Vizaun no Misaun ne’ebé iha.

Diretór Ezekutivu FDCH, Júlio Aparício hato’o agradesimentu ba Prezidente Konsellu Administrasaun ho membru tomak ne’ebé sempre iha vizaun no hanoin di’ak hodi suporta programa no atividade FDCH nian.

“FDCH tenke sai sentru naroman ba ema hotu,  iha rai ida ne’e, sai sentru naroman katak hadaet lia loos no justisa ba ema hotu, hadaet koñesimentu no siesénsia ba joven sira, hadaet ksolok  no hamnasa ba emar sira ne’ebé susar no terus, se hadaet naroman katak hakman no hadalan, hadaet naroman katak hahú sente ema seluk nia susar no terus, se hadaet naroman katak hakman no hadalan, hadaet naroman katak hahú sente ema seluk nia susar no terus, naroman katak iha laran luak hodi tulun ema seluk, keta haluha tulun la’ós ho liafuan de’it, tulun ne’e asaun no hahalok ne’ebé halo ema seluk kontente no hamnasa tanba ema seluk nia hamnasa mak sasukat ba ita nia susesu, ema seluk nia susesu mak sasukat ba ita nia servisu maka’as, ida ne’e mak dehan sai  masin no naroman ba mundu,” Hateten Diretór Ezekutivu FDCH, liu husi  komunikadu ne'e jornal INDEPEDENTE, asesu tersa (24/03).

Iha tempu hanesan, Ministru Ensinu Superior, Siénsia no Kultura, José Honório da Costa Pereira Jerónimo,  parabeniza FDCH no hato’o agrdesimentu ba Sua exelénsia, Primeiru Ministru, Kay Rala Xanana Gusmão ne’ebé iha inisiativa hodi harii FDCH iha 2011.

“Agrdese ba Primeiru Ministru tanba iha hanoin harii Fundo de Desenvolvimento do Capital Humano, ne’e importante, tanba  vizaun ne’ebé luan ba Timor nia futuru, ohin iha ema barak sai doutor, sai mestradu sai lisensiatura ne’e tanba FDCH, Timor-Leste presiza ema matenek barak, para bele muda ita nia sosiedade,  Ita-boot sira servisu iha FDCH tenke hametin ida ne’e hanesan legadu Governu nian atu servi povu, instituisaun ida ne’e tenke metin, imi tenke oferese imi nia enerjia atu servisu  di’ak ba ita nia estadu, di’ak ba ita nia sosiedade, diak ba ita nia joven sira, Timor-Leste presiza ida ne’e,” hateten Ministru.

Ministru Jose Honório mos, enkoraza Diretór Ezekutivu  ho estrutura atu servisu maka’as liutan, servisu ho laran, hanesan timor-oan.

 “Ita servi malu ho di’ak, haree malu ho di’ak nafatin para ita bele dezenvolve ita nia rekursu umanu mais di’ak liu iha futuru,” Katak nia.