Tuir observasaun Jornalista Online INDEPENDENTE nian iha terenu observa katak, dadaun ne’e ekipa hahú hamos fatin sira hodi monta palku, monta tenda, halo instalasaun ba liña eletrisidade sira, no mós halo prepasaun ba parada militar ne’ebé sei partisipa iha sermonia isar bandeira, iha komemorasaun loron FALINTIL ba dala-50.
Iha observasaun ne’e mós haree katak, ekipa ne’ebé involve iha parada militar hala’o hela treinamentu ba 20 Agostus nian maka hanesan, pelotaun ida husi Forsa komponente Naval, forsa Infantaria, Unidade Espesial Polisia liu husi Batalhão Ordem Publiku, Unidade Polisia Maritima, Unidade Polisia Fronteira, seguransa sivil no bombeiros.
Iha preparasaun ne’e, marka mós prezensa Husi Xefe Estadu Maior F-FDTL, Brigadeiru Jenerál José da Costa Soares “TRIX”.
Entretantu, rekorda katak, iha loron 30 fulan-Jullu tinan ne’e, Governu liu husi reuniaun Konsellu Ministru aprova projetu Rezolusaun Governu ne’ebé aprezenta husi Primeiru-Ministru,Kay Rala Xanana Gusmão, kona-ba komemorasaun aniversáriu ba da-50 Forsa Armada Libertasaun Nasionál Timor-Leste (FALINTIL) nian, ne’ebé maka selebra iha loron 20 fulan-agostu tinan 2025.
Tuir rezolusaun ne’e, komemorasaun sei hala'o iha territóriu nasionál hotu, inklui serimónia no atividade sira iha munisípiu Lautein, Baukau, Vikeke, Manatutu, Manufahi no Likisá iha loron 18 fulan-agostu; iha Ainaru, Kovalima, Bobonaru, Ermera, Aileu, Rejiaun Administrativa Espesiál Oekusi-Ambenu no Illa Ataúru iha loron 19 fulan-agostu; no Dili iha loron 20 fulan-agostu.
Programa ne’e inklui hala’o parada militár, desfile populár sira, misa agradesimentu, enkontru hodi halo reflesaun kona-ba pás, seguransa, konvivénsia sosiál ne’ebé saudavel no kestaun jéneru nian, nune’e mós atividade kulturál sira no vizita hodi fó onra ba semitérius ne’ebé hakoi Martir sira Pátria nian.
Iha Aileu, sei iha misa iha Igreja Saun Paulo no Saun Pedro no tuir-mai tau ai-funan besik iha estátua saudozu Nicolau Lobato nian. Iha Díli, komemorasaun prinsipál sira sei hala’o iha Largo Tasi Tolu no inklui konferénsia internasionál g7+, desfile militár, diskursus ofisiais, kondekorasaun, asinatura protokolu ho Repúblika Populár Xina ba konstrusaun Ospitál Militár Forsas Armadas nian, han-kalan hamutuk, no konsertu muzikál ho partisipasaun husi artista nasionál no internasionál sira seluk.
Rezolusaun Governu ne’e determina mós katak, aleinde serimónias protokolares no militares, tenke hala’o atividades kulturais no desportivas, inklui teatru, poezia, dansa tradisionál no atuasaun muzikál sira, liuliu envolve joven no estudante sira.
Governu mós fó toleránsia pontu iha munisípiu sira ne’ebé kobre, liuliu iha loron ne’ebé selebrasaun aniversáriu ba da-50 FALINTIL nian hala'o iha ne'ebá. Determina mós hodi harii komisaun organizadora interministeriál ida, ne’ebé lidera hosi Ministru Defeza no iha koordenasaun ho F-FDTL, iha responsabilidade atu koordena atividade hotu-hotu no asegura envolvimentu hosi membrus Governu iha selebrasaun sira iha munisípiu balun.