Tuir Prezidente KNTI, Aniceto Leto Soro hatete, tinan ida ne’e hanesan tinan mundial ba eliminasaun traballu infantil iha mundu. Hanesan país ne’ebé ratifika ona konvensaun traballu infantil.

Timor-Leste liu husi Komisaun Nasiónal Kontra Traballu Infantil (KNTI) ho nia parseiru sira hanesan KSTL, CCITL, PlAN Internasional, inspesaun jéral traballu no Governu hakarak kontribui ba selebrasaun ida ne’e hodi deklara komitmentu servisu ne’ebé halo atu prevene no kombate traballu infantil iha mundu liu-liu nasaun Timor-Leste.

“Iha loron ida ne’e ami hanesan komisaun nasiónal kontra traballu infantil husu ba Governu no parseiru sira atu sevisu hamutuk hodi elimina traballu infantil iha ita nia rai laran,”dehan nia iha konferensia imprensa, iha salaun IGT, Hudi-Laran Dili, sesta ohin (14/05).

Tuir dadus rezultadu peskiza iha tinan 2016 hatudu labarik sira iha Timor laran hamutuk rihun 442, entre labarik sira ne’e kuaze pursentu 16 mak halo servisu.

Husi labarik pursentu 16 ne’e iha pursentu 12 mak konsidera traballu infantil no maioria husi sira ne’e halo servisu  perigozu.

Tanba ne’e, komisaun nasiónal kontra traballu infantil no mós parseiru sira servisu hamutuk halo ona esfosu balun hodi aprezenta ba Governu atu bele elimina numeru sira ne’e.

“Ami halo servisu lubuk ida no aprezenta ona dokumentus balun ba Governu VIII konstituisional atu bele ajuda tekniku inspesaun jéral atu bele halo kontrolu ba implementasaun,”tenik nia.

Nia hatutan, eliminasaun ba traballu infantil iha komprimisu tolu atu prevene no kombate mak hanesan, husu ba Governu liu husi Minitériu relevante atu apoiu hodi aseleira aprovasaun ba esbosu planu asaun nasiónal traballu infantil.

Apoiu governu halo analiza legal ba armonizasaun idade minimu adminisaun iha mundu traballu no husu Governu atu aprova esbosu lista perigozu hodi haforsa no hametin servisu inspesaun jéral traballu.

Entretantu, Xefe Gabinete SEFOPE, Graziela Fatima hatete, esbosu lei ba planu asaun nasiónal kontra traballu infantil agora dadauk aprezenta ona ba iha Ministériu Koordenadór Asuntus Ekonómiku (MKAE), tempu badak sei lori ba aprezenta ba iha Konsellu Ministru.

Enkuantu, tuir dadus UNICEF tinan 2016 total traballu infantil hamutuk 67.886 (16%) ne’ebé ativu iha ekonomiku hodi sustenta familia.

Husi numeru ne’e kompostu husi labarik mane 32.995 no labarik feto 34.300.

Husi total ne’e 67.886 (16%) iha na’in 62.710 mak iha area rural no na’in 4.978 iha area urbanas.

Aliende labarik sira ne’ebé tuir eskola deit hamutuk pursentu 70,7(70.7%), iha empregu ho eskola 13,2 %, iha empregu 2,9%, laiha empregu no la iha eskola 13,2%.

Asistente Editor: Saturnina da Costa