Desizaun Knsellu Ministru ho objetivu atu hametin kooperasaun iha setór enerjétiku, ne’ebé sei asina iha semana oin.
Iha reuniaun KM, Ministru Petróleu no Rekursus Minerais halo aprezentasaun ida kona-bá Memorandu Entendimentu ho Governu Brunei Darussalam.
MoU ne'e ho objetivu atu hametin kooperasaun iha seitór enerjétiku ne’ebé sei asina iha semana oin.
Entendimentu ida-ne’e estabelese kuadru kolaborasaun entre nasaun rua ne’ebé foka bá fahe koñesimentu, dezenvolvimentu kapasidade téknika no promosaun oportunidade investimentu, liu-liu iha área petróleu no gás.
Kooperasaun ne'ebé prevee ona inklui atividade formasaun no fahe esperiénsia, hala'o estudu konjuntu sira iha área peskiza, esplorasaun, dezenvolvimentu no produsaun nian, no mós troka prátika di'ak kona-bá polítika enerjétika.
Akordu ne'e mós fó dalan bá dezenvolvimentu hosi inisiativa sira seluk ne'ebé sei define hamutuk hosi parte rua.
Hafoin asinatura, Ministériu Petróleu no Rekursus Minerais (MPRM) sei garante implementasaun dispozisaun sira iha memorandu ne’e, iha koordenasaun ho entidades kompetente no tuir lejizlasaun nasionál aplikável.
“Ohin, ha'u mai aprezenta mós draf MoU ida ke atu asina iha Brunel Darussalam ne'ebé ministeriu sei ba akompaña sua exelensia Primeiru Ministru (Kay Rala Xanana Gusmão) iha Brunei, nune'e aproveita oportunidade ida akordu tiha ona ho sira parte husi Brunei nian, atu halo akordu MoU ida ba servisu sira iha area mina no gas nian,” Esplika Ministru Petróleu Rekursu Minerais, Francisco Monteiro ba jornalista iha Palasio Governu, kuarta (30/04).
enkuantu, Vise-Ministru bá Fortalesimentu Institusionál Saúde, José dos Reis Magno, halo aprezentasaun ida kona-bá Memorandu Entendimentu ho Governu Brunei Darussalam, relasiona ho kooperasaun iha área saúde ne’ebé sei asina iha semana oin.
Memorandu Entendimentu ida-ne’e ho objetivu prinsipál atu estabelese kuadru kooperasaun ida entre nasaun rua, bazeia bá respeitu no benefísiu mútuu, ho hanoin atu hametin servisu saúde no dezenvolve setór ne’e.
Área prinsipál sira bá kooperasaun maka servisus saúde, prevensaun no kontrolu moras, dezenvolvimentu rekursus umanus no mós reforsu infraestrutura ba ospitál sira.
Kooperasaun ne’e bele inklui fahe informasaun no koñesimentu, troka espesialista sira, formasaun téknika, hala'o semináriu, no mós dezenvolve projetu konjuntu.
Reprezenta Portavos Governu, Vise Ministru Asunto Parlamentar, Adérito Hugo da Costa, hateten, los duni Primeiru Ministru sei halo vizita ofisial ba Brunei Darussalam nomós Singapura no Filipina.
Tanba ne'e, nia dehan, hare ba relasaun Timor-Leste ho Brunei Darussalam diak tebe-tebes, entaun aproveita vizita Primeiru Ministru nian iha setór balun ke prepara mós asina memorandu Entendimentu ho Governu Brunei Darussalam.
“Asina memorandu Entendimentu ne'e ida mak husi Ministeriu Saúde no ida seluk maka Ministeriu Petróleu Rekursu Minerais,” Nia hato'o.
Entretantu, akordu rua ne’e sei asina iha Brunei Darussalam no sei assiste direta hosi Primeiru-Ministru (PM), Kay Rala Xanana Gusmão.