Deklarasaun ne’e hato’o ba jornalista sira iha Salaun Maubai, hafoin serimónia pose estrutura foun Khunto iha Postu Administrativu Dom Aleixo, Domingu (24/05).

Tuir Naimori, Timor-Leste presiza lideransa feto ida ne’ebé iha ‘fuan boot’ no kapasidade atu servi nasaun ho laran moos no responsabilidade.

“Sim, hakarak atu hatete ba ita-boot sira katak Timor ne’e presiza feto ida ne’ebé fuan boot atu bele servi nasaun ne’e ho di’ak. Nia hakarak duni atu kandidata aan,” dehan Naimori.

Nia esplika, razaun Khunto suporta Berta tanba partidu hakarak haree Timor-Leste lidera husi feto ida, ne’ebé konsidera nu’udar parte husi mehi partidu no mehi povu Timor-oan sira.

“Tuir loloos, ami-nia mehi mak haree feto ida lori nasaun ne’e ba oin,” nia afirma.

Maski nune’e, Naimori seidauk fó data ofisiál kona-ba formalizasaun kandidatura ne’e.

Nia dehan, agora daudauk Khunto hein de’it desizaun final husi Berta rasik.

“Ita hein husi Prezidente. Prezidente fó sai ona, ita prontu,” nia hatete.

Iha parte seluk, Naimori subliña katak partisipasaun Khunto iha eleisaun prezidensial la’ós atu halo kompetisaun ho líder polítiku sira seluk, maibé atu hatudu ba povu katak lider ida ne’ebé onestu no iha fuan boot mak povu hakarak.

“Ita la kompete ho sira, maibé ita hakarak hatudu katak lideransa ne’ebé povu hadomi mak lider ida ne’ebé servisu ho onestidade no laran moos,” dehan nia.

Nia hatutan, ikusmai desizaun hotu sei fila ba povu, liuhusi avaliasaun ba programa no vizaun kandidatu idaidak nian.

“Depende ba povu atu hili. Bainhira rona programa ne’ebé di’ak, povu sei hili atu bele servi nasaun ho dignidade,” nia dehan.

Entretantu, iha eleisaun Prezidensial 2022, Berta sai mós kandidatu ba Prezidente Repúblika.

Iha altura ne’ebá, Berta kompete ho kandidatu na’in 15 seluk, maibé nia la konsege avansa ba ronda daruak tanba hetan de’it votus 56.690 ka 8,7% iha ronda dahuluk.