Promesa ida ne’e hato’o hafoin Komisaun Funsaun Públika (KFP) no Ministériu Edukasaun realiza enkontru ho Komisaun G Parlamentu Nasionál trata asuntu edukasaun.

“Ohin ami koalia ona hodi inisia durante fulan ida sei buka informasaun no ideia sira atu nune’e iha fulan ida nia laran ita bele iha ona solusaun. Entaun ohin hanesan audensia, ami koalia ba malu, no espera katak iha prosesu ne’e nia laran ita bele iha ona solusaun balun ba problema sira ne'e,” informa Prezidente KFP, Agostinho Letecio de Deus, ba jornalista sira iha PN, Kinta (14/03).

Durante audensia, nia dehan, konkorda mós atu iha fulan ida nia laran, KFP buka dadus kona-ba husi profesor kontratadu na’in 1.485, na’in hira mak tuir teste bolsa kandidatu.

“Loos duni durante ne'e iha profesor 1.485, fulan hirak liu ba deside hodi la tama iha ingresu, maibé prosesu ida agora halo ne’e mak teste ba bolsa kandaditu, entaun husi ne'e mak KFP sei haree númeru husi 1.485 hira mak tama ba bolsa kandidatu. Se sira tama ona ba signifika dalan ida atu rezolve problema, nune'e KFP ho ME sei deside hamutuk fali de’it sira ne'ebé la konsege tama ba teste bolsa kandidatu ne'e," katak nia.

Nia esplika, iha buat rua ne'ebé presiza haketak mak sira ne’ebé la tama ba ingresu mak sira ne'ebé kontratu to’o 2022, no ho sira ne’ebé hetan kontratu iha 2023.

"Ha’u hanoin ita akompaña beibeik Ministra Edukasaun Dulce de Jesus esplika beibeik, iha posibilidade lubuk ida mak sira bele asina ba kontratu determinadu ou ida mak indenimizasaun fulan ida ba sira ne’ebé mak kontratu tinan tolu, ida ne’e to’o 2022.”

“Agora iha 2023 mak agora ita buka hela solusaun no halo hela diskusaun, ne’e mak KFP hamutuk ho Parlamentu Nasionál, no mós Ministériu Edukasaun sei buka solusaun iha fulan ida nian laran, hanesan orientasaun husi Prezidente PN," dehan nia.

Iha fatin hanesan, Prezidente Komisaun G, Armando Lopes hatete, durante audensia ne'e Komisaun G fó tempu tomak ba KFP atu esplika prosesu tomak relasiona ho problema ba profesor kontratadu sira.

“Prezidente PN husu ona atu KFP ho Ministériu Edukasaun iha fulan ida nia laran bele rezolve problema profesor sira nian, entaun agora sei iha prosesu hela no Ministériu Edukasaun, PN no KFP sei tuur hamutuk hodi buka solusaun ikus ba rezolve problema manorin-nain sira nian,” dehan nia.

Entretantu, iha loron 13 Marsu, reprezentante eis manorin-nain kontratadu hasoru ona Prezidente Parlamentu Nasional, Fernanda Lay, no deputadu husi Komisaun G hodi hato'o sira-nia preokupasaun no fo tempu ba PN hodi buka solusaun ba sira-nia problema.

Portavos eis Manorin-nain kontratadu, Agustinho Pinto informa, iha audensia ho Prezidente PN no Komisaun G, nia parte aprezenta razaun fundamental tanba sa mak sira kontinua halo asaun hasoru Ministra Edukasaun.

"Ohin mós Prezidente Parlamentu Nasional dehan sei fó tempu fulan ida ba nia atu buka solusaun no dialogu ho Ministra Edukasaun no Komisaun Funsaun Publika, no Prezidente Parlamentu Nasional mós husu par ami hapara ona manifestasaun. Ne'ebé ami mós sei rona ida ne'e no sei fó fiar tomak ba Prezidente Parlamentu Nasionál nu'udar mós reprezentante povu iha uma-fukun ne'e," nia hatete.

Portavos ne’e hatutan, sira hato’o mós sira-nia razaun tanba sa mak lakohi kompete iha bolsa kandidatura ne’ebé ME loke.

Nia hein katak, ho audensia ne’e ba oin PN sei buka komunika ho Ministra Edukasaun, nune'e tenke iha solusaun ba sira-nia problema ne'ebé sira hasoru.

"Ami hanoin tenke iha solusaun, nu'udar sidadaun tenke iha solusaun, tanba buat hotu-hotu ita tenke kumpre ba lei no regras, entaun ohin buat sira mak ami aprezenta ba Prezidente Parlamentu Nasional. Ne'ebe ita fó fiar tomak ba Prezidente Parlamentu Nasional atu buka solusaun, ami fiar sei iha solusaun," katak nia.