Kordenadór Forsa Tarefa ba Prevensaun no Mitigasaun Surtu Covid -19 iha Timor-Leste, Rui Maria de Araujo informa katak, progresu atividade prevensaun no mitigasaun surtu Covid-19 iha munisipiu Dili, husi kinta horseik loron 11 to’o mai sesta ohin 12 fulan marsu, amostra ne’ebé rekoilla iha atividade buka tuir kontaktu besik no mós vijilansia sintinela iha tan kazu positivu na’in 11.
“Kazu foun ohin loron ekipa konjunta saúde deteta tan ema na’in 11 no pasiente Covid-19 ne’ebé baixa iha sala izolamentu Vera Cruz aumenta ba 76,”dehan nia iha konferensia imprensa, CCD, (12/03)
Nia esplika, kazu positivu ida husi aldeia 4 de setembru suku Comoro, postu Administrativu Dom Aleixo, positivu ida ne’ebé kontaktu besik ho kazu iha Cluster Ministériu Transporte Komunikasaun.
Kazu positivu 4 iha aldeia frekat, Bairu-Pite, Postu Administrativu Dom Aleixo, ne’e halo kontaktu besik ho kazu ida iha Cluster Ministériu Finansa nian.
Kazu positivu na’in 4 profesional saúde ne’ebé halo formasaun kona-ba Emergency Obstetrics and Neonatal Care iha HNGV, sira ne’e hotu kontaktu besik ho professional saúde ida ne’ebé mós halo formasaun hanesan iha HNGV ne’ebé anunsia ona iha loron 10 fulan marsu.
Hamutuk hotu sira na’in 5 ne’ebé tuir formasaun no detetadu nuudar kazu positivu.
Sira laos servisu iha HNGV, maibé kontaktu besik ho profesional saúde ida ne’ebé positivu iha loron 9 fulan marsu.
Kazu 2 rezultadu positivu, no na’in rua seluk tan rezultadu vijilansia sintinela iha sentru saúde formoza.
Na’in ida hela fatin iha aldeia mate restu vila-verde no ida fali iha aldeia 03, suku Fatuhada.
SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu