Vise Diretór Asosiasaun HAK, Antonino de Limas hateten, dialógu fronteira entre Oekusi Naktuka ho komunidade sira iha fronteira ne'e ko'alia karik inisitiva ne'e husi sira rasik ne'e ema ho ema husi nasaun viziñu.

"Entaun ne'e pasu di'ak importante tanba entre komunidade iha fronteira entre Indonézia ho Oekusi ne'e iha relasaun sósiu kulturál sira, sira istorikamente sira na'in entaun ne'e pasu di'ak, bele rezolve problema balun mosu entre sira karik liga ho husu rekursu rai ne'ebé iha ho ninia legalidade entre estadu ne'e seidauk termina loloos fronteira," dehan nia, iha knaar fatin, Faról, horisehik.

Nia dehan, maibé tanba sira bele uza hamutuk rai iha ne'eba, entaun saida mak komunidade sira halo entre rai rua ne'e pasu importante no merese apoiu.

"Kona-ba governu ninia papél ha'u hanoin saida mak Primeiru Ministru atu halo ne'e tenke informa ba parte Indonézia nian ho Prezidente Prabowo, nune'e atu haree iha nivél estadu ne'e," nia dehan.

Nia reforsa, entre governu, la'ós husik de'it komunidade sira entre sira mak rezolve problema, maibé intervensaun estadu sentrál governu tenke iha nafatin, maibé prosesu sira ne'e husik entre ema ho ema sira la'o.

Antonio akresenta, governu fó apoiu molok entre formál ida entre estadu ho estadu halo negósiu deside fronteira terrestre entre nasaun rua.

"Ha'u hanoin Primeiru Ministru halo ne'e di'ak liu tan, atu reforsa saida mak inisitiva husi komunidade entre rai rua ne'e," nia konklui.

Entretantu, iha fatin ketak, Dosente husi Institute Of Busnise (IOB), Antonio Soares Martins hatete, kona-ba asuntu fronteira terrestre entre Indonézia ho Timor-Leste ne'ebé Primeiru Ministru sei hakerek karta ida ba Prezidente Prabowo Subianto, hanoin espera husi karta ne'e, depois sira ninia dialógu ne'e bele hatudu rezultadu di'ak ba ita, liu-liu kona-ba fronteira.

"Ha'u hanoin ne'e Primeiru Ministru ninia servisu ne'ebé durante nia sempre halo mak ida ne'e. Ita husu nune'e karta ne'e bele iha dialógu ne'ebé di'ak, nune'e bele hetan rezultadu di'ak entre fronteira terrestre ita nia no mós Indonézia ho Timor-Leste nian. Ita konkorda ho karta ne'ebé Primeiru Ministru sei hakerek ba Prezidente Prabowo Subianto ne'e," nia ténik.