Provedór Virgilio Guterres da Silva hatete, loloos ne'e tinan kotuk ne'e hahú tanba orsamentu iha ona OJE 2024, Parlamentu aprova ona orsamentu besik tokon US$ 7 milioens, atu halo modelu konstrusaun ba edifisiu PDHJ dezeñu.

Kuandu dezeñu iha ne'ebá ona, katak dezeñu DEDN survei no dezeñu ne'e prontu ona hein atu halo konstrusaun de'it, entaun orsamentu iha ona loloos tinan kotuk, la konsege la'o.

"Ita uza modalidade sira ne'ebé ke iha konkursu públiku ka kotasaun, ne'ebé CNA sira husu hela bá PDHJ atu deside adota modalidade ida ne'ebé ami diskute hela. Posivelmente se laiha buat ruma ne'ebé ke obstakuliza ha'u hanoin tinan oin konstrusaun ba edifisiu PDHJ foun nian hahú ona," dehan nia, iha knaar fatin, Kaikoli, Kinta (30/10).

Tanba ne'e, parte provedor halo hela preparasaun atu sees husi fatin ne'e iha fulan oin, nune'e parte tekniku bele hahú ona ho konstrusaun bainhira iha ona kompañia.

"Tarde liu Dezembru ami sei sai husi fatin ne'e, nune'e fatin ne'e husi hela bá parte tekniku enjinaria sira no kompañia sira hahú konstrusaun kona-ba edifisiu ne'e," dehan Virgilio.

Tuir nia, ko'alia kona-ba buka ne'e tenke aluga uza osan Estadu nian, entaun tenke respeita mekanizmu sira ne'ebé ke administrasaun ka administrativmente aplika.

"Administrativamente aplika katak ami buka hela fatin pelumenus ami buka fatin kotasaun tolu ka haat ida hanesan ne'e mak ami deside ida ne'ebé razuavel finanseiramente no mós bele akomoda ami hotu, Iha fatin lubuk ida maka ami identifika hela," nia akresenta.

Provedor argumenta, fatin balun bele dehan Exelcior iha Pantai Kelapa ne'ebá, iha City 8 no Timor Lodge, PDHJ buka hela fatin sira ne'e depois mak sei bele análiza ida ne'ebé natoon ho PDHJ nia kapasidade finanseiru atu aluga.

Entretantu, tuir observasaun Iornalista independente nian nota katak iha edifisiu PDHJ dadaun ne'e ninia plafond sira nakloke hela ona.