Udan bot refere nia efeitu mai husi fenómeno meteorolojiku ho naran Osilasaun Madden-Julian (OMJ) no alem ida ne’e, nia efeitu mai husi mos Siclone tropical, baixa presaun ou depresaun(L) ho velocidade anin: 63- 69 km/h, ne’ebé lokaliza iha Sudoeste Kupang, distansia 297 km husi Dili.
Tuir previzaun husi BoM, ciclone sei desloca ba diresaun Noroeste Austrália, tamba né probabilidade intensidade udan sei diminui (fraca - moderada) enkuantu rajadas anin sei kontinua ho velocidade entre 20- 46 km/h (moderado - forte) iha Dili no parte litoral sira seluk (area nebe besik tasi), ho velocidade anin 34 -64 km/h (forte-muito forte) iha parte interior (area sira nebe la besik tasi) iha loron segunda feira to’o kalan no komesa diminui iha loron tersa to’o 9 abril iha Dili inklui fatin sira seluk.
Diresaun Nasional Meteorolojia no Geofísica (DNMG),Timor Leste fó atensaun nafatin, konsekuensia udan boot tau halo rai okos bokon hotu, possibilidade sei provoka rai halai (deslizamentu), subsidensia, fatuk monu husi foho leten no aí hun boot sira né mos Iha possibilidade bele monu bainhira anin boot.
Entretantu impaktu husi udan boot no hamosu inundasaun halakon ona ema vida na’in 27, no na’in 8 sei lakon (seidauk hetan).
Inundasaun iha kapital Dili too ohin loron konfirma hamutuk na’in 13 mak lakon sira nia vida. Ema ne’ebé lakon sira nia uma no hela fatin hamutuk rihun 7 to’o rihun 8.
Hela fatin emerjensia ba vitima sira hamutuk 12 no numeru barak liu mak iha Dom Bosco Komoro hamutuk 2.477 no familia atus 5 resin.
Kaikoli ema na’in 815 no familia 180, no mos iha edifisiu Ministériu Finansas iha familia na’in 656, iha Liseu iha ema na’in 528, Crus Vermelha formasa iha familia na’in 30, iha infordepe iha familia na’in 120 resin no Igreja Bidau mos iha familia na’in 35, klinika Bairu Pite no iha madre salesiano, no Seroja Komoro, total vitima ne’ebé evakua hamutuk rihun 8.
Enkuantu kanalizasaun apoiu ba vitima sira kontinua lao liu husi Sekretaria Estadu Protesaun Sivil (SEPS).
Jornalista: Saturnina da Costa
Editor: Jose Sarito Amaral