Ekipa konjunta halo detensaun, apreensaun no buska domisiliariu ba suspeitu FA iha ninia rezidensia iha Metiaut, Postu Administrativu Kristu Rei, Munisipiu Dili, bazeia ba mandadu husi tribunal, tanba iha indisius forte suspeitu iha ligasaun ho arguidu nain sia (9) ne’ebé molok ne’e envolve iha ilistu droga.

Iha prosesu ne’e, suspeitu FA koopera ho autoridade hodi halo buska ba iha sasan sira hotu iha kontetór ne’ebé suspeitu importa husi rai li’ur.

Hafoin ida ne’e, ekipa mós kontinua halo buska no apreensaun ba iha suspeitu FA nia uma iha área Taibesi hodi rekoila tan evidensia balun.

Tuir ekipa, suspeitu  FA viola artigu 7 husi lei númeiru 2/2017 kona-ba kosumu ilísitu droga.

Hafoin prosesu hirak ne’e, ekipa lori suspeitu FA ba detein iha sela PSIK, Kaikoli, hodi kumpre oras 72 molok submete ba Interogatoruu Dahuluk iha Tribunál Distritál Dili (TDD).

Hafoin ekipa konjunta halo detensaun, apreensaun no buska iha prosesu suspeitu nia rezidensia, suspeitu nian Defezór Privadu  Estaqui Guterres, hateten, nia prezensa  iha nia kliente nia rezidensia ne’e  tanba hetan kontaktu husi nia kliente.

Durante detensaun, apreensaun no buska, iha suspeitu nia rezidensia hetan mós akompañamentu husi suspeitu nian defensor privadu, Estaqui Guterres.

“Ha’u mai akompaña ha’u-nia kilenta iha prosesu buska ne’e, tanba hetan telefone husi ha’u-nia kliente rasik, tanba nia ha’u-nia kliente entaun ha’u mai,” dehan Estaqui ba jornalista sira iha Metiaut, Kinta (01/09).

Nia esplika, estatutu Defensoria Públika fó dalan atu Defesór Públiku halo akompañamentu ba nia kliente bainhira polisia halo apreensaun no buska.

“Kualker, iha momentu saida de’it no kualker ema ida ne’ebé mak presiza defensór bele fó garantia ba nia kliente, la taka dalan ema ne’ebé mak sente sai hanesan vitima, ou sente prezudika, kontaktu defesór tenke ba,” nia esplika.

PSIK Hein Orden Kontinua Investiga Kazu Arguidu na’in 9

Portavoz Invetigador Polisia Sientifiku Investigasaun Kriminal (PSIK), Octávio da Costa Araújo, hatete, servisu PSIK ba kazu droga ne’ebe komete husi arguidu na’in (9) remata ona bainhira Tribunal aplika Termu Identidade Rezidensia (TIR) no Aprezentasaun Periodika (AP) ba arguidu sira.

“Ida ne’e ha’u labele kometa, tanba daudaun ne’e Ministeriu Publiku halo hela rekursu ba tribunal (rekursu) kona-ba arguidu na’in 9 ne’ebé komete kazu ilisitu ba droga, tanba ami servisu termina provizoriu ka pauza provizoriu,” dehan Octávio iha nia kna’ar-fatin, KaiKoli, Díli, Kuarta (31/08).

Nia afirma, bainhira PSIK produz ona auto-notisia, haruka ona ba Prokurador Jeral Republika, aprezenta ona ba iha tribunal hodi tuir interrogatoriu dahuluk, no halo ona julgamentu, PSIK laiha ona kompetensia atu koalia.

“Maibé rezultadu agora ita hotu hatene Tribunal aplika Termu Identidade Rezidensia ho Aprezentasaun Periodika no Ministeriu Publiku sei halo hela rekursu ba kazu ne’e, ami labele fo komentariu, tanba ne’e ami hanesan ezekutador prontu simu orden, bainhira iha ona delegasaun foun mai ami prontu atu halo invetigasaun klean tan ba kazu ne’e tuir rekomedasaun ne’e mak ita Tribunal husu ba Ministeriu Publiku hato’o ba ami.”

“To’o agora kompleta ona loron 15, maibé desizaun Tribunal ba rekursu ne’ebe mak Prokurador Jeral Republika submete hikas ba kazu seidauk iha, ami labele fó kometariu ruma, laiha baze legal ruma iha ami-nia liman,” katak nia.