Xefe Estadu ne’e hatete, nia sei husu ba atual Prezidente Repúblika Indonezia nian, Prabowo Subianto bainhira hasoru-malu.
“Ha'u sempre ko'alia ho sira Indonézia. Bainhira ha'u simu posse nu'udar Prezidente Repúblika halo kedas komisaun ida ho komandante Longuinhos Monteiro, Alexadrinho no sira seluk tan, sempre ko'alia ho Primeiru Ministru no sira ba to'o iha Indonézia ko'alia ho Jenerál balun iha Indonézia.”
“Ha'u rasik ko'alia ho Susilo Bambang Yudhoyono, antes ko'alia ho Susilo, koalia ho ibu Mega (Megawati), sira hotu-hotu (hodi dehan) ‘ami hakarak Nicolau Lobato nia ruin’, sira bele hatene iha ne'ebé mak to'o agora seidauk iha rezultadu 100%," dehan Horta bainhira halo vizita ba fatin Saudozu Nicolau Lobato mate, iha Binani, Suku Mindelo, Postu Adminisrativu Turiskai, Munisipiu Manufahi, hanesan jornalista INDEPENDENTE sita husi pájina ofisiál Prezidensia Repúblika Demokrátiku Timor-Leste, José Ramos Horta, Segunda (18/08).
Horta dehan, ekipa ida, inklui mós nia husu ona ba líder sira Indonézia antes, atu hatudu Saudozu nia Nicolau Lobato nia ruin, nune'e Estadu Timor-Lesta bele halot ho dignu.
“Ha'u espera karik hasoru Prezidente Repúblika Indonézia Prabowo iha Timor-Leste ka Indonézia, ha'u sei husu ba nia, tanba nia hatene, ne'e sei sai simbolika boot Prabowo mak entrega mate restu Nicolau Lobato,” katak Horta.
Entretantu, Saudozu Nicolau Lobato nia oan mane, José Lobato hein aprosimasaun ne’ebé estadu Timor-Leste halo ho estadu Indonezia.
Jardin iha Binani
Relasiona ho selebrasaun loron Falintil ba dala 50, Prezidente Repúblika, José Ramos Horta ho Komandante Falintil Forsa Defeza Timor-Leste (F-FDTL), Falur Rate Laek, no Jenerál reformadu, Lere Anan Timur, hala’o vizita ba fatin ikus Prezidente Nicolau Lobato iha Binani, Suku Mindelo, Postu Adminisrativu Turiskai, Munisipiu Manufahi.
PR Horta hatete, nia vizita ne'e hanesan vizita respeitu omenajen ba Nicolau Lobato hodi haree mós ho matan rasik, nune'e bele halo buat ruma atu rai ne'ebé nia monu sai rai ida sagradu.
Xefe Estadu ne’e informa mós kona-ba ninia planu atu halo serimonia ida iha 31 Dezembru, ne’ebé mós nu’udar loron mate Prezidente Nicolau.
Aleinde ne’e, nia dehan, nia iha hanoin mós atu halo jardin Nicolau Lobato.
“Hanesan iha Metinaro ita iha jardim dos herois, ita la bolu semiteriu dos herois. Ideia ne'e mai husi doutor Marí Alkatiri mak deside, nia mak hatene ida ne'e, hahú loke semiteiru Metinaro ne'e nia mak hatete ‘lalika bolu semiteiru maibé bolu jardim dos herois. Ha'u mós hanoin ida ne'e ita bolu mós Jardim Nicolau Lobato," hatete PR Horta refere ba Binani.
Bainhira loke jardin Nicolau Lobato ne'e sei la limite see de'it atu bele vizita no halo perigrinasaun iha fatin refere tuir ema-nia fiar no kultura.
“Tanba Saudozu Nicolau Lobato ema ida ne'ebé fiar-na'in sempre reza, sempre kaer biblia iha nia liman. Ne’eduni ha'u fiar fatin ida ne'e mós sai fatin espiritual, Jardim Nicolau Lobato no sira seluk ne'ebé mate iha fatin ne'e omenajen mós ba sira hamutuk ho Nicolau Lobato".
Saudozu Nicolau Lobato nia oan mane, José Lobato hatete, se PR Horta iha hanoin halo Jardin Nicolau Lobato signifika estadu tenke tau fasilidade iha fatin refere, ne’ebé mós sei ajuda hasai area Binani husi izoladu.