Vigario Episcopal Pastoral Arquidioseze Dili, Padre Juvito do Rego de Jesus Araujo informa, misa funebre Amu Papa Francisco nian sei realiza iha 26 Abril 2025, tuku 18.00 oras Timor-Leste, iha Tasi Tolu.

Misa funebre ne’e sei prezide husi Amu Bispu Dioseze Baukau, Dom Leandro Maria Alves.

Padre Juvito hato’o deskulpa ba sarani sira tanba molok ne’e komunika tiha ona ba públika katak misa sei hala’o iha 27 Abril.

Mudansa ne’e mosu hafoin simu komunikadu ofisial husi Vatikanu katak Amu Papa Francisco ninia misa funebre iha Vatikanu sei hala’o iha 26 Abril, tuku 10.00 dader oras Italia.

Padre Juvito hatete, serimonia funebre ne’e Igreja ho Governu kontinua servisu hamutuk hanesan mós bainhira simu Amu Papa ninia vizita mai Timor-Leste.

“Iha eventu Ida ne'e Ita hotu-hotu hetan konvite atu ba selebrasaun misa funebre Amu Papa nian. Regra sira sei lao tuir protokolu ne'ebé estabelese ona husi MAE hanesan reprezentante Governu ninian atu servisu nafatin iha area ida ne'e. Koordena ona ho autoridade sira, PNTL ho departamentu hotu-hotu ne'ebé iha ninia knaar atu halao idaidak ninia funsaun iha momentu ida ne'e," dehan Padre Juvito liu husi konferensia imprensa iha Kamara Eklesiastika Lecidere, Kuarta (23/04).

Nune’e, Padre Juvito husu sarani atu koopera di’ak ho autoridade ne’ebé simu knaar atu mantein orden atu selebrasaun ne’e bele lao ho di'ak.

Kona-ba atributu sira hanesan kamizola, sapeu no subrina ne’ebé fahe durante Amu Papa ninia vizita, Padre Juvito hatete, sarani idaidak bele uza nafatin hodi manifesta nafatin entusiasmu no domin ba Papa Francisco.

“Kamizola, sapeu, subrina fahe fulan hirak liu ba, idaidak lori ninian atu manifesta nafatin ita-nia entusiasmu, ita-nia domin ida ne'ebé ita manifesta iha loron 9 to’o 11 Setembru 2024 sei manas nafatin iha ita-nia leet ka lae. Ita sei iha nafatin jeitu ida ne'ebé doko mundu ho ita ninia prezensa tinan kotuk ninian,” dehan Padre ne’e.

Iha fatin hanesan, Ministru Administrasaun Estatal (MAE), Tomas do Rosario Cabral informa, PNTL sei organiza misa iha Tasi Tolu.

"Tanba Ita hatene kuandu la organiza transporte sira para arbiru de’it, labele fó asesu ba populasaun atu hola iha misa ne'e," dehan Ministru ne’e.

Ministru ne’e husu nafatin ba sarani sira ne’ebé sei partisipa iha misa funebre atu uza nafatin kamiza Amu Papa nian.