Nia hatutan, situasaun Covid -19 iha nasaun India hanesan avizu ida ba nasaun iha hotu Azia nian, inklui Timor-Leste atu labele halimar no kontra hodi halo prevensaun ba Covid-19.
“Se ita la halo tuir regras prevensaun mak nasaun Timor-Leste bele infrenta situasaun ne’ebé pior liu tan,”dehan nia iha rezidensia farol, kuarta ohin (28/04).
Horta hatutan, situasaun iha India bele afeta ba nasaun vizinu sira hanesan Pakistan, Bangladesh, Maynmar, Thailandia no bele haksoit mai iha sudeste aziatiku inklui Timor-Leste.
Ho situasaun ida ne’e halo Eis Prezidente Republika mós senti tauk, nune’e hanesan sidadaun ida ne’ebé iha responsabilidade hakruk husu ba povu tomak no joven sira hodi kumpri nafatin medidas preventiva ne’ebé Organizasaun Mundial Saúde (OMS) no Ministeriu Saúde (MS), implementa hodi ema hotu tenke kumpri atu nune’e bele kombate Covid -19 iha Timor Leste.
“Ita labele halo buat ne’ebé hafraku fali Governu no estadu nia esforsu oinsa halo medida prevensaun ba kombate Covid -19 iha Timor-Leste no ita labele impede fali prevensaun Covid-19 ne’e ho razaun politika”,tenik nia.
Tanba ne’e nia husu ba populasaun tomak tenke kumpri regra OMS no Ministerio Saúde nian hodi uza maskara ho diak no labele tara fali iha kakorok, tenke aplika distansiamentu sosial minimu metru 2, fase liman beibeik ho sabaun ka uza dezinfekta ruma.
Aleinde nia apela ba povu tomak atu konsume aifuan barak hanesan sabraka, pateka, hudi no ai fuan seluk, halo exersisiu no mós evita konsume masin midar barak tanba bele provoka diabetes no Covid-19 bele da’et lalais hanesan ema nain tolu mate ba Covid-19 foin lalais ne’e.
Nune’e nia husu mós ba povu tomak atu kontinua fiar ba governu hodi kombate no prevene Covid-19 iha Timor-Leste no labele fiar politiku sira hodi politiza fali governu kona ba Covid-19.
Entretantu, kazu konfirmadu Covid-19 iha nasaun India iha loron horseik (27/04) hamutuk 147, 539. 302 (millaun) no mate na'in 3, 116. 444 (millaun).
Enkuantu dadus Covid-19 iha Timor-Leste ba loron (27/4), kazu foun 99, kazu rekupera hamutuk 76, no kazu ativu iha izolamentu hamutuk 1073.
Jornalista: Camilio de Sousa
Editor: Jose Sarito Amaral