Print this page

HNGV Suspende Transferénsia Pasiente ba Rai Liur Featured

By Elsa Belinha Abril 08, 2020 2602
HNGV Dili. HNGV Dili.

DILI: Hospitál Nasionál Guido Valadares Dili (HNGV) suspende transferénsia pasiente ba rai liur relasiona ho ameasa surtu covid-19 iha nasaun hotu-hotu iha mundu liliu ba Timor-Leste.

Pasiente ne’ebé suspende halo transferénsia ba rai liur mak atu hetan tratamentu kona ba Kemoterapia no Radioterapia.

Prezidente Junta Mediku HNGV, Marcelino Correia hatete, komesa kazu surtu viruscorona pozitivu iha Timor-Leste, maka Ministériu Saúde haruka karta ba junta médiku katak agora dadaun provizoriu suspende pasiente sira ne’ebé maka presiza halo transferensia ba rai liur.

“Labarik na’in rua maka presiza atu halo tratamentu ba kemoterapia maibé suspende hela,”dehan Marcelino iha nia knaar fatin HNGV, ohin.

Maski suspende pasiente ba rai liur, HNGV iha alternativa atu fó nafatin tratamentu ba pasiente too estadu emerjénsia ne’e remata.

Tanba ne’e, nia ko’alia ona ho médiku espesialista onkolojista sira husi Singapura atu bele fó instrusaun mai hodi nune’e médiku sira iha Timor-Leste bele halo tratamentu provizoriu atu bele aguenta.

Nia esplika, lolos iha pasiente barak maka presiza atu halo transferénsia ba rai liur maibé orientasaun husi Ministériu Saúde hodi suspende transferénsia ne’e.

Prezidente Junta Médiku HNGV ne’e mos la esplika detaillu koa-ba kuantidade pasiente ne’ebé maka tama iha planu atu halo transferénsia no tipu moras sira.

Rate this item
(0 votes)