Print this page
bebé. Foto google bebé. Foto google

HNGV Bandu Fó Susu-been Formula ba Bebé Featured

DILI: Hospital Nasional Guido Valadares (HNGV) bandu inan sira labele fó susu-been formula ba bebé sira ne’ebé mak foin moris husi idade 0 to’o fulan 6.

Xefe Gabinete Kontrolu Kualidade no Komunikasaun Sosial HNGV, Sara Xavier hatete, polítika HNGV implementa ospitál hadomi kosok-oan atu fó hanoin ba inan sira atu labele fó susu-been formula ba bebé sira ne’ebé foin moris to’o fulan fulan 6 hodi akompaña ai-han nutritivu.

“Bebé sira foin moris mai durante fulan 6 nia laran autoriza inan sira fó de’it susu-been inan nian ba bebé sira,” dehan nia iha HNGV Bidau, Tersa (08/09).

Atu implementa politika ne’e, nia dehan, parte ospital hato’o informasaun ba pesoal seguransa sira prende susu-been formula no bibiron ne’ebé familia pasiente sira lori tama area HNGV.

Tanba ne’e, Sara informa ba iha komunidade sira katak ospitál la autoriza família sira lori bibiron no susu-been formula mai HNGV hodi fó ba kosok-oan sira ne’ebé mak foin moris.

Nia esplika, impaktu husi susu-been formula ba bebé sira foin moris ne’e la di’ak, tanba bele kauza ba moras hanesan diáreia, infesaun vias respiratóriu, no moras sira seluk ne’ebé fó ameasa ba bebé sira-nia vida.

Nia dehan, bainhira bebé atinze ona idade fulan 6, nafatin fó susu-been inan nian, no bele akompaña ho susu-been formula no ai-han nutritivu sira seluk.

“Tenke fó susu-been inan nian to’o bebé tinan rua hodi bele dezenvolve di’ak liu tan bebé sira-nia fíziku no mental.”

“Dala-barak inan sira lori susu-been formula mai pesoal saúde sira prende no fó edukasuan saúde ba sira atu labele fó bibiron ba bebé sira ne’ebé foin moris,” dehan nia.

Maibé, nia hatete, ba bebé sira ne’ebé mak foin moris bo sira-nia inan hetan komplikasaun ne’ebé todan hanesan baixa iha ICU no iha sala operasaun, médiku sira mak sei indika katak bebé ne’e presiza suporta husi susu-been formula ho tipu ne’ebé define tiha ona husi doutór sira no hetan rekuñesimentu husi doutór sira.

Read 1454 times
Rate this item
(0 votes)