Ministru Edukasaun Juventude no Desportu, Armindo Maia informa katak, hafoin Sala Situasaun Integradu Jestaun Krize (SIJK) deteta ema na’in rua positivu Covid-19 iha BTN 2 Tasitolu, domingo kalan, nunee MEJD foti kedas desizaun suspende provisoriamente eskola sira iha Dili.

Realidade hatudu, katak segunda ohin (8/3), atividade eskola hotu iha Dili la lao.

“Horikalan foti kedas desizaun suspende provisoriamente eskola husi mota komoro (ponte CPLP) too Tasitolu, maibé ohin KOnsellu Ministru deside aplika serka sanitaria iha Munisipiu Dili, no ha’u sei hasai despaixu atu suspende prosesu aprendizazen hotu iha Munisipiu Dili,”dehan Ministru ne’e, hafoin paritispa reuniaun Konsellu Ministru extraordinaria, iha Ministériu Finansa, segunda ohin.

Entretantu, Ministru Ensino Superior Siensia no Kultura, Longuinhos dos Santos reforsa katak atividade aprendizazane ba Ensino superior iha Munisipiu Dili mos sei suspende hotu durante semana ida.

Tuir dadus atual Covid-19, hatudu katak pasiente na’in 35 halao tratamentu iha sala izolamentu Vera Crus Dili.

Ekipa prevensaun no mitigasaun Covid-19 mós halao hela teste swab ba komunidade sira ne’ebé iha kontaktu ho pasiente sira iha aldeia terra santa, tasitolu Dili.