Tuir komunikadu ne’ebé Online INDEPENDENTE asesu katak, memorandu ne’e sei asina husi Sekretáriu Estadu Komunikasaun Sosiál, Expedito Dias Ximenes, no Ministru Komunikasaun Malázia, Ahmad Fahmi bin Mohamed Fadzil, iha marjen Simeira ASEAN ne’ebé sei hala’o iha loron 24 to’o 26 fulan-Outubru iha Kuala Lumpur, Malázia.

“Akordu ne’e hakarak hametin kooperasaun bilaterál entre nasaun rua ne’e iha área informasaun no komunikasaun sosiál, promove troka esperiénsia, dezenvolvimentu kapasidade téknika, no inovasaun dijitál iha setór ne’e,” haktuir Kominikadu ne’ebé Online  ne’e sita iha pajina governu Timor-Leste, Kuarta (08/10).

Iha komunikadu ne’e haktuir tan katak, área sira kooperasaun nian ne'ebé planeadu maka inklui transformasaun dijitál no inovasaun iha domíniu sira informasaun no mídia nian, fahe polítika sira informasaun nian no prátika regulatóriu sira, troka no fahe konteúdu notísia no informasaun nian.

Aliened ne’e, iha mós kolaborasaun iha teknolojia radiodifuzaun no televizaun nian, formasaun no dezenvolvimentu rekursu umanu sira no promosaun kooperasaun nian iha domíniu sira produsaun filme no dokumentáriu nian.