Print this page

Governu Seidauk Deside Loke Aeroportu Featured

By Pedro Alves Juñu 29, 2020 2799
Aeroportu Internasional, Nikolau Lobato, Dili. Aeroportu Internasional, Nikolau Lobato, Dili.

DILI: Maske periodu Estadu Emerjensia datoluk remata ona, maibé governu seidauk iha desizaun atu loke fila transportasaun aero. Ministru Transporte no Komunikasaun Agostinho da Silva hatete, to’o ohin loron governu seidauk bele deside bainhira mak atu reativa konetividade aero ho Indonezia, Singapura, no Malazia.

“Ita iha ligasaun aero ho Indonezia, Malazia ho Singapura, tan ne’e atu reativa fali ita sei tetu didi’ak ho desizaun koletiva husi Konsellu Ministru nian, dehan Agostinho iha edifsiu Ministériu Finansas Aitarak-Laran, Dili, Sabadu, (27/06).

Nia dehan, maske iha TL laiha ona kazu pozitivu Covid-19, maibé iha nasaun barak Covid-19 sei kontinua, tan ne’e, governu presiza tetu didi’ak molok foti desizaun.

Maske nune’e, nia hatete, iha reuniaun komisaun interminesterial deside ona atu asegura nafatin konetividade aero Timor-Leste ho Australia.

“Presiza asegura nafatin konetividade aero ho Australia liu husi kontratu ne’ebé governu selebra ona ho kompaña aviasaun Airnorth to’o fulan Jullu,”dehan nia.

Agostinho dehan, objetivu husi estensaun kontratu ho Airnorth atu bele fó atendimentu emerjensia karik Timor-Leste presiza.

“Durante periodu implementasaun estadu emerjensia, kompaña Airnorth mak asegura ita-nia konetividade hodi halo atendimentu ba nesesidade emerjensia sira, no fulan tolu (3) ita ultrapaa ona no oinsa ba oin atu asegura nafatin ita-nia konetividade mak komisaun interminesterial hatur ona desizaun katak presiza estende tan ba fulan ida, entaun ita estende tan ninia duransaun tempu ne’e iha kontratu ne’e ba fulan ida tan,” katak nia.

Rate this item
(0 votes)

Related items