“Governu iha hanoin atu fó bolsa estudu ba jornalista senior sira ne’ebé hakarak kontinua eskola iha departamentu komunikasaun sosial,”dehan Sekretariu Estadu Komunikasaun Sosial Expedito Loro Dias Ximenes ba Jornalista sira, iha Salaun DNDM-SEKomS, Palasiu Governu, Dili, Segunda ne’e (23/06/25).

Ba bolsa estudu ne’e, Governante ne’e dehan, SEKomS halo ona koordenasaun ho Ministeriu Ensinu Superior Siensia no Kultura atu bele haree kona ba kriteriu sira ne’ebé maka atu fasilita jornalista sira asesu ba iha ensinu superior sira iha teritoriu nasional.

“Ba bolsa estudu ne'e konferme ami nia koordenasaun ho Ministerio Ensino Superior Siensia no Kultura nian, maximu na’in 10, tanba ne’e ami sei aprezenta kriteriu sira ou rekejitus ne’ebé jornalista senior sira ne’ebé priense, bainhira priense ona rekejitus sira ne’e maka ami sei propoin ba iha Ministeriu Ensinu Superior Siensia no Klutura,”tenik nia.

Sekretariu Estadu Komunikasaun Sosial ne’e hatutan, kada media sei delega ninia jornalista , tuir kriteria ne’ebé SEKomS sei hato’o ba media sira.

Tanba iha kriteriu ne’e, sei fó oportunidade ba jornalista ne’ebé hala’o ona servisu iha orgaun komunikasaun sosial sira, durante tinan lima ho ninia dezempeñu servisu ne’ebé diak. Enkuantu, kona ba idade, sira ne’ebé halo ona tinan 17 to’o 30.

Bolsa estudu ne'e espesifiku ba iha nível lisensiatura, maibé karik média ne'e iha de'it ema lisensiatura no sira propoin sira-nia jornalista kontinua ba mestradu mós bele, importante prienxe rekezitu ne'ebé Governu estabelese.

Aleinde ne’e, ba hirak ne’ebé iha área komunikasaun sosial nian, maibé hakarak espesifiku ba iha lian inglés no portugués ne’e mós bele.

Entretantu, ensinu superior ne’ebé jornalista sira sei hala’o estudu ba maka hanesan iha UNITAL, UNTL no UCT.