Print this page

Governu Prepara Ona Fatin ba Vitima Inundasaun Featured

By Agustino Santos Gama Setembru 24, 2021 723
Vitima afitadu sira ne'ebe hela iha lona okos. Foto:INDEPENDENTE. Vitima afitadu sira ne'ebe hela iha lona okos. Foto:INDEPENDENTE.

DILI: Governu liu husi Ministériu Justisa (MJ) hamutuk ho Diresaun Terras no Propriedades, prepara ona fatin hodi harii bairu foun ba vitima ne’ebé afeitadu husi inundasaun iha loron 4 fulan-Abril tinan 2021.

Enkuantu, fatin sira ne’e mak hanesan, Beduku, Hera no Tibar.

Ministru Justisa (MJ) Manuel Cárceres, hatete, kona-ba re-alokasaun vitima sira, ida ne’e Ministériu kompetente mak sei haree, maibé parte Ministériu Justisa nian mak prepara ona rai iha fatin tolu ne'e.

“Iha rai ba ita atu halo re-alokasaun ba ita nia maluk sira ne’e no hau nia intensaun ne’e ami Loro-sa’e ba Hera, Loro-monu ba Tibar no sira rai klaran ne’e ba Beduku,”dehan nia iha Palasio Governu, kinta horseik (23/09).

Entretantu, antes ne’e, Sekretáriu Estadu Protesaun Sivil (SEPS) Joaquim dos Reis Martins, hasoru malu ona ho Xefe Governu Taur Matan Ruak, hodi diskute atu fó solusaun ba komunidade uma kain 131 ne'ebé dadaun ne’e sei hela iha lona okos.

“Sira ne’ebé dadaun iha sentru evakuasaun tanba sira nia uma la eziste ona, sira ne’e hela iha fatin risku dezastre nian hanesan iha mota ibun, foho lolon tanba ne’e rai halai sobu uma no mós mota sobu uma sira ne’e, uma laiha tanba ne’e sira sei iha sentru evakuasaun, ne’e duni ita tenke buka solusaun ba sira, se ita fó materiál konstrusaun ba sira hari’i mak sira hari’i iha fatin risku ba dezastre, ida ne’e mak sei sai ameasa ba sira,”tenik Joaquim.

Nune’e, iha sentru evakuasaun neen (6) mak sei ativu no total vitima sira hamutuk uma-kain 131 no membru familia  701.

 

Asistente Editor: Saturnina da Costa

Rate this item
(0 votes)