Print this page

Governu Monu Bebeik, PR Lakohi Monu Tan Iha Futuru Featured

By Domingos Gomes Maiu 20, 2020 2667
Presidente Republika Fransisco Guterres Lu Olo. Presidente Republika Fransisco Guterres Lu Olo.

DILI:Ho esperensia moruk iha pasadu ne’ebé hatudu Governu sempre monu no laiha dezenvolvimentu ida signifikante hahú husi Governu FRETILIN too VII Governu, maka fó sasin ba Presidente Repúblika Fransisco Guterres Lú Olo tenki kuida no tetu molok foti desizaun ba formasaun Governu.

Realidade formasaun Governu só uniku IV Governu Konstitusionál maka metin too nia mandatu remata, no seluk monu iha dalan klaran.

Tanba ne’e, Prezidente Repúblika Francisco Guterres Lú-Olo esplika, nia sempre tetu desizaun ruma atu nunee bele hametin no fó estabilidade governativa hodi halo dezenvolvimentu ba povu too mandatu remata.

Liu husi prosesu ne’e maka Xefe estadu fó tempu ba líder polítiku sira hatasak ida-idak ninia hakarak no buka hametin relasaun partidu ba partidu, atu sira kontribui hodi hetan solusaun ne’ebé bele lejitima no sustenta Governu atuál ka Governu foun, liu husi Parlamentu Nasional, maibé PR laiha relasaun ho partidu politiku sira.

“Ita hotu bele haree katak partidu sira ho asentu parlamentar mak buka malu rasik hodi hetan  solusaun ba krize institusional ne’ e, maibé ha’u la tama iha relasaun partidu sira nian,”dehan PR Lú-Olo hafoin hatoo mensajen nasional ba loron Restaurasaun Independénsia ba dala-18, iha Palasiu Presidensial Bairu-Pite Dili (20/05).

PR Lú-Olo dehan, lei partidus polítikus fó dalan atu partidu polítiku sira organiza malu oinsá de’it,  liu husi koligasaun, aliansa  ka movimentu polítiku bele mós fó liman ba malu liu de’ it husi entendimentu polítiku ida ne’ebé bazeia ba insidénsia parlamentar. partidu polítiku sira uza lei ida ne’e hodi hili dalan ida. 

Nia afirma, iha prosesu relasaun partidu ba partidu mak mosu maioria parlamentar, maibé maioria parlamentar ida ne’ebé metin ba tempu naruk mak fó kbiit no estabilidade ba Governu durante ninia mandatu.

“Ita hotu bele haree katak partidu sira ho asentu parlamentar mak buka malu rasik hodi hetan  solusaun ba krize institusional ne’e,” katak Lú-Olo.

PR Lú-Olo esplika, iha prosesu ida ne’e maka mosu faktu sira ne’ebé iha relevánsia konstitusionál ba Prezidente Repúblika foti dezisaun polítika ida ke boot, final no vinkulativu, atu demite ka la demite Governu, atu disolve ka la dissolve Parlamentu Nasional.

PR Lú-Olo hatutan, husi prosesu ne’e mosu maioria parlamentar foun ida ho partidu polítiku tolu ho asentu parlamentar - PLP, KHUNTO, no FRETILIN.  Maioria ne’e, ho deputadu 36, deklara  ona sira apoiu tomak no metin ba VIII Governu Konstitusional no Primeiru-Ministru Jeneral Taur Matan Ruak. Faktu ida ne’e apoia kontinuidade no fó estabilidade ba VIII Governu Konstitusionál.

“Faktu ida hanesan ne’e mak relevánsia konstitusional ba dezisaun polítika ha’u atu fó konfiansa  ba VIII Governu hodi ukun to’o mandatu ramata, iha tinan 2023,”afirma PR Lú-Olo.

Tanba ne’e deputadu sira iha Parlamentu Nasional reprezenta povu tomak sira nia devér maka buka kontribui didi’ak ba funsaun lejislativa, fiskalizasaun no desizaun polítika ne’ebé Konstituisaun Repúblika haruka.

Rate this item
(0 votes)
Last modified on Kuarta, 20 Maiu 2020 17:19