Sekretáriu Estadu Komunikasaun Sosial, Expedito Loro Dias Ximenes, dehan, dadaun ne'e sira kontinua hala'o negosiasaun ho Google no Youtube iha Jakarta, Malázia no singapura hodi oinsá bele estabelese ninia reprezentasaun iha Timor-Leste.

"Governu esforsu nafatin, ha'u no Ministériu Transporte bainhira ba halao servisu ba rai liur ami mos nafatin buka, tanba atu loke nia reprezentasaun iha Timor-Leste ne’e la'ós fasil, tanba iha kriteriu barak no iha kondisoens barak ne’ebe presiza atu prense molok sira bele loke representasaun", dehan SEKomS, iha Kaikoli, Sábadu (29/11).

Nia dehan, kritériu atu loke reprezentasaun Google no Youtube iha Timor-Leste mak, velosidade internet, tanba TL nia velosidade internet agora bele dehan ladun makas, no sei uza hela internet husi TimorTelecom, Telekomcel no Telemor, no foin maka tama starlinks, ne’ebe hein katak ho prezensa fibra Optika ne’e kondisaun ka kriteriu ida atu bele Youtube ho Google bele hare kondisaun no aselera loke sira nian reprezentasaun iha Timor-Leste.

Nia adianta, mezmu seidauk loke ninia reprezentasaun iha Timor-Leste, maibé Timor oan barak ne'ebé ba rejista iha Indonézia, no sira hetan ona retornu finanseriu balun husi sira nia servisu ne’ebe matenek, ne'ebé sira halo husi konten. Maibé SEKOMS ho MTK sei esforsu nafatin atu loron ruma bele iha reprezentasaun Google no Youtube iha Timor-Leste.