Print this page

Governu husu tan EE, La Autoriza Ema Tama husi Fronteira Featured

By Husi: Cristina Ximenes Fevereiru 19, 2021 437
Fronteira. Foto: Independente Fronteira. Foto: Independente

DILI: Relasiona ho situasaun atual Covid-19 iha Timor-Leste, governu sei husu dala ida tan ba Prezidente Repúblika Francisco Guterres Lú Olo hodi estende Estadu Emerjensia ba dala 11. Iha implementasaun EE ne’e, sei kontinua taka fronteira, nune’e laiha ema ida mak bele tama no sai.

Primeiru Ministru Taur Matan Ruak hatete, Konsellu Ministru deside ona atu fulan oin estende tan EE.

“Ha’u atualiza ba Xefe Estadu ida mak kona-ba estensaun estadu emerjensia ne’ebé Konsellu Ministru deside atu fulan oin ne’e ita kontinua halo estensaun,” informa PM Taur hafoin enkontru ho PR Lú Olo iha Palasiu Prezidensiál Bairu-Pite, Kinta (18/02).

PM Taur hatete, iha implementasaun EE, sei kontinua taka fronteira, katak ema sei la tama-sai, exeptu kazu emerjensia.

“Ita kontinua taka fronteira, ita agora autoriza tama ne’e mak sasan sira de’it maibé ema la tama, hanesan kazu emerjensia ruma, moras buat ruma ka nesesidade ida ne’ebé importante liu mak ita autoriza,” dehan PM Taur.

Kona-ba sidadaun sira ne’ebé kontinua tama illegal, PM Taur rekoñese defisil atu bele kontrola, tanba area fronteira luan.

“Ita fnia ronteira ne’e kuaze 100 kilometrus, bainhira ita taka di’ak ne’e só ita halo moru de’it, ita-nia moru iha uma sira ne’e dala-ruma naok-teen sei haksoit liu tama, ha’u koalia uitoan ida ne’e ha’u hatene, tanba ha’u uluk gerileiru ne’ebé ida ne’e ha’u hatene taka ne’e taka oinsá ne’e, ita-nia uma dala-ruma ita taka metin mós naok-teen tama di’ak hela,” dehan nia.

Entretantu, Timor-Leste hahú implementa Estadu Emerjensia relasiona ho pandemia Covid-19 iha fulan Marsu nia laran. EE dahuluk hahú iha 28 Marsu no remata iha 26 Abril, hafoin estende tan loron 30, husi 28 Abril no remata iha 27 Maiu.

Bainhira EE daruak besik remata ona, goveru propoin tan ba PR Lú Olo atu estende, no ikus mai ho autorizasaun husi Parlamentu Nasionál PR Lú Olo dekreta tan EE datoluk hahú husi 28 Abril to’o 27 Maiu, tuir mai EE kontinua estende husi 4 Agostu no remata iha 4 Setembru.

Iha fulan Setembru nia laran, governu husu tan EE dalima, no ikus mai PN fó tan autorizasaun ba PR Lú Olo hodi dekreta, hahú husi 5 Setembru no sei remata iha 4 Outubru.

Bainhira EE dalima besik remata, governu propoin tan EE daneen, no ikus mai hafoin hetan autorizasaun husi PN, PR Lú Olo dekreta tan EE daneen hahú husi 5 Outubru no remata iha 3 Novembru.

Hafoin EE daneen remata, governu husu tan EE dahitu no ikus mai hafoin rona opiniaun husi Konsellu Estadu no Konsellu Superior Defeza no Seguransa, PR Lú Olo husu autorizasaun ba PN hodi dekreta EE dahitu.

PN fó duni autorizasaun no PR dekreta EE dahitu hahú husi 4 Novembru no remata iha 3 Dezembru.

EE daualu ba hahú implementa iha 4 Dezembru 2020 no remata iha 2 Janeiru 2021. Hafoin ida ne’e kontinua EE dasia husi 3 Janeiru no remata iha 1 Fevereiru 2021.

Tanba kazu Covid-19 ne’ebé kontinua aumenta, governu husu tan EE dasanolu no ikus mai ho aprovasaun husi PN, PR Lú Olo dekreta tan estensaun EE ne’ebé hahú implementa iha 2 Fevereiru no sei remata iha 3 Marsu 2021.

Rate this item
(0 votes)
Last modified on Sexta, 19 Fevereiru 2021 14:59